- "Magbalik la ring matuling a sibad..
- —Becquer
- "Magbalik la ring matuling a sibad..
Anti mo ing pepabalu na nang Lucas, dinatang ya
i’lbarra king tutuking aldo. Ing mumuna nang paman
dalo depata'na karing sapni nang Kapitan Tiago ba'
neng akit i'Maria Clara at sabya’na king ing kayang
Kakamalkamalan tinggap na neng myuman king relihyon.
Magdala yang sulat a mangamanu king kura a
sinulat na kabud ning Arzobispo. E mu ditak ing tula
na kaniting Darang Isabel, uling buri ne ing baintau
at e na pagmatulan ing pamakyasawa ning pangunaka'na
kang Linares. I’Kapitan Tiago ala yu bale.
“Lungub kayu,” ngana ning dara king ditak nang kastila. “Maria, i’Don Crisostomo ati'ne naman king gratia, ning Dyos; pepatawara’ne ning Arzobispo.”
Dapot ing baintau e ya mekasulung, ing timan mitda ya karing kayang labi at ing amanu tinakas king kayang katandanan. Lele ning balkun, makatalakad, lele nang Maria Clara atiyu i'Linares, tatali no ring kasapunggul a bulaklak karing bulung ding kukulate tanaman. King lapag makakalat la ring rosas at sampaga. I'Maria Clara, makahilig king kayang silyon, maputla, migugunain, malungkut a panlalawe, pyalunga’ne ka ring kayang gamat ing abanikung marpil a e binang maputing anti mo ring malantik nang taliri.
King panyatang nang Ibarra, i’Linares menimutla ya at ding pisngi nang Maria Clara mikulayan lang malutu. Migtangka yang talakad, dapot, kulang king sikanan, beba no ring mata at pepabusta'neng menabu ing abaniku karing kayang gamat.
