“Dapot, Donya Victorina, Donya Victorina!” nganang maputlang sinalabat Linares at linapit ya kaya.
"Mangawat kayu; e yu paganaka kanaku. ..” at nganang tinuglung king maynang siwala. "E ko Sana barusbarus, lain na ngeni.”
Kabang malilyari iti, dinatang yang ibat king sabungan i’Kapitan Tiago, malungkut at mangisnawang saldak; mesambut ya ing manuk nang lasak.
I'Donya Victorina e ne dininan panaun mangisnawa, karing mapilan amanu at dakal a panagkas selita na kaya ing milyari, at, anti mo ing mapapanaya, pepalto na king biling mayap ing kayang katawan.
"I’Linares pakilabana'ne darandaman yo? Nung ali é ye paintulutan makyasawa king kekong anak, e yu paintulutan! Nung ala yang tepangan, é ne bage i'Clarita.”
"Makyasawa ka wari king taung ita?” nganang kinutang Sinang kang Maria Clara, at ding masaya pang mata kinatmu la king Iwa. Balu ku king ika maingat ka, dapot e ka salawayan.
I'Maria Clara, maputlang anti mo ing kandila, mipabalikid ya at linawe no karing matang metilihan ing kayang igpa, i’Donya Victorina ampon i’Linares. Iting tawli mengalutu ya, i’Kapitan Tiago beba no ring kayang panlalawe, at ing babai nganang tinuglung: "Clarita, tandanan mu, e ka makyasawa kapilan man king lalaking e makapantalun. Ilantad na ka king kabilyan a nung nu angga ring asu palkaran da ka.” Dapot ing dalaga e ya mekibat at ngana karing kakalugura'na:
"Idala yu ku king sidwan ku, e ku pa milakad dilidili.”
Sinopan deng tinikdo, at makapatulug ing kayang awakan karing mangabilug dang takde ring kayang kakaluguran, makapaungle ing malagu nang buntuk king pago ning malinang a Victoria, linub ya ing dalaga king kayang sidwan.
Ita kabud bengi ding myasawa tinipun do ring karelang gamit, pepabalu ra kang Kapitan Tiago ing karelang singil a minabut mapilan libu, at kabukasan, misnang karanun, meko lang papunta Menila king kotsi na niti. King malamarine Linares likwan da ing dake ning talapamali.
