"Ning Duque de la Torre, Victorina," nganang tinuru ning kayang asawa.
"Ya naman ita, sabyan mu pa kaku. .
"Akit ke ing Padre Damaso king kekong balen?” nganang sinalabat Linares minarap king Padre Salvi "Sasabyan da kaku king malapit ya keti.
"Tutu atyu keti at datang ya kilub ning makuyad a panaun," nganang mekibat ning kura.
"Karagul ku tula! Ating kung sulat para kaya,” nganang minyabi ning anak. "Nung e mu king uli na niting masayang pamikatagun a midala kaku keti, pintalan ku ne sana.”
Kabang malilyari iti migising ya ing "masayang pamikatagun."
"De Espadana?” nganang Donya Victorina kaybat ning almusal, "alben te i'Clarita?"
At kang Kapitan Tiago:
"Para kekayu mu, Don Santiago, para kekayu mu. Ing asawa ku e ya manulu nune mu karing taung maki matas a kabilyan, a ita man. . .! Ing asawa ku e re kalupa ding mediku keti.. . karin Madrid e ya manapa nune mu karing taung ating matas a kabilyan.
Linub la king sidwa'ning masakit.
Itang karinan halus madalumdum ya ngan, ding awang pakasara la pauli ning takut king paglub ning angin, at ing ditak a salang pasala karin manibatan karing kandilang makasindi arapa'ning larawa'ning Virgen de Antipolo.
Makatali ya buntuk king metung a panwelong mebasa king agua de colonia, makabalut mayap a katawan karing maputing ulas a dakal a tuklip misisinup karing ubug ning katawa’nang birhen. Makakera ya ing dalaga king kama nang kamagung, pilatan ding kortinang husi at pinya. Ing kayang bwak, anti mong marcong makapatulug king makapabilug nang lupa, lalung pakilala ketang malino putlang dirinan da na mung bye ding mangaragul nang matang mitmung lungkut. Lele na atilu ring adwa nang kakaluguran, at i'Andeng magtalan yang sangang azucena.
I'De Espadana linawe ne pulsu i'Maria Clara, linawe ne dila, kitna’neng mapilan kutang, at nganang pipiling minyabi:
