kindat niti ngana wari king e na sana kakalingwan
itang sinabi na kaya king pisamban.
Ing kura mibablas ne at migmula na ing kapagmasusyan. Ing sakristan mayul a bulag metung a mata tatalna'ne ing libru, at ing metung a munisilyus yang tatalan king pamindita ampon king timbang maki agua benaita. Ding aliwa, makapadurut, makatalakad at alang kupya tahimik lang tahimik at makikilala ing gagalgal ya siwala i'Padre Salvi bista man mayna mu ing pamamasa na. Lilan da na king kahun a bubug ing anggang sukat mibili karing pahayagan, medalya, kwalta, aliwa pa at ing sabla dituk da king silindrung tingkaputi at pekatalik deng sinusi.
"Ginung Ibarra, buri yeng ibili ing kahun king lugal na, ing kura iti yang panaya’na,” nganang sinitsit ning alkalde king bayntau.
"Matula kung matula,” nganang mekibat niti, “dapot samsaman ku ing dangalan a yan king Ginung Escribanu. Ing Escribanu yang dapat gawang katandanan kaniti.”
Ing Escribanu tinggap na iti king mitmung kapagmaragulan. Tinipa ya king eran a maka-alpombra at tinaglus ya lalam ning kulkul at king mitmung kagalangan lila’ne ing kahun king kulkul ning batu. Ing kura kanita binendisyuna’ne ing batu.
Ing balang metung kanita mibili yang metung a kutsarang balas a maki api king labi na ning kilkulan dang batu a makabili lalam ning kulkul ban keta itang batung katakap na milapat yang masalese. Binye neng Ibarra king alkalde ing metung a kutsarang kanteru at king malapad nang bulung a pilak makatatak ya ing kayaldawa’ning pamagmasusi. Ing alkalde kanita pepawaga ya king amanung kastila.
“Memalen San Diego!” nganang mipnung degulan: “Dangalan mi ing pamamuntukan kaniting maulagang kapagmasusyan a e mi na sukat ilarawan pa kekayu. Mitalakad ya ing metung a pipagaralan. Ing pipagaralan ya ing panalumpakana’na ning balen. Ing pipagaralan ya ing aklat a nung nu makasulat ing payn tungulan da ring bansa. Jpakit ye kekami ing pipagarala’na ning metung a balen at sabyan mi kekayu nung nanu ya ing balen a yan.”
