Alang nanu mang maragul a bage milyari karing taung sasalita tamu ketang kabisperasan at ketang kapyestan inya iti malyari ta nang lakton nung e mu sana ing pamigaganaka ming magkang pota ating dayuhan a bisang makabalu nung makananu rang pagmasusyan ding pilipinu ing pista ra. Pauli na niti ilikas mi la ring mapilan a sulat dikil kaniting pamagmasusi. Ing metung kareti sulat ne ning talasulat ning metung a pikabalwan at e biru-birung Pahayagan Menila, kalangalangnan uli ning manyabi ya king katutwan. Ding babasa kaniti ila nang balang manuman king mangalating kamalyan a misulat.
Ing mapuring talasulat oyni ing bilalag na:
- Ginung Talapabulalag . . .
- Magiting kung kakaluguran: Kapilan man e
ku pa menakit at e ku tinaptinapan atangalan karing lalawigan ing metung a mahalan a pamagmasusi king pistang balen, ganap king sigla at makapanigtig panamdam, a anti mo ing tengalan kung pigmasusyan da ring kagalanggalang at banal a paring franciscano.
Tutu lang dakal ding tinagun. Keni, mika panaun kung pugayan ku la ring halus sablang kastila king lalawigan, atlung paring Agustinu king Lalawigan Batangas, adwang paring Dominicu, ing metung kareti ing kagalanggalang a Fray Hernando de la Sybila. King panyatang na peparangala'ne ing balen a ini, dangalan a e ra sukat kalingwan ding memalen. Ikit ku la naman ding mangatas nang tau ning Cavite at Pampanga, ding mabandi ning Menila, at dakal a bandang musikus, metung ka reti ing magaling nang banda ning Pagsanhan, a
