palsinta ring asan, ketang bandang ita, ating metung
a taung e karaniwan.
Metung yang lalaking makaturung a malapad a makabalut bulung tanaman at makalunus a pamimalan. Makalebita yang gisi-gisi, salol a malwalas, anti mo ing karing intsik, galut misusumangid. Marinat at mangalaglag no ring sapi’na. Uli ning malapad nang turung e me akakit a lupa, kabud na madalumdum ing atitilip mu, dapot ketang dalumdum a ita ating malagad-lagad kikislap adwang tindag a matatdang agad. Matas ya at ketang kilus na balamu anak ya pa. Bibili ne king gabun ing metung a salikap, kaybat dumayu ya at kaybat sumabi yang e mu bitasang ayntindyan. Manaya yang makatalakad misnang dayu, balamu mo wari mipangilag la, ya at ding tau. Penandit, ating babaing lumapit king salikap na at mibibili lang prutas, asan danum, abyas at aliwa pa. Potang ala nang bibili king salikap na, pasibayung maramdam ing siwala, ngeni malungkut, bilang pasalamat mekad. Kaybat, dakluta’ne ing salikap at munta neman king aliwang lugal at makanyan mu naman ing dapta'na.
Inisip nang Maria Clara king itang taung ita medesgrasya ya inya kitang nang maliswas nung ninu ya.
"Ing leprosu..," ing pekibat nang Iday. "Apat neng banwang mika sakit kanyan. Ding aliwa ngara king minawa ya kang Inang na. Atin namang sasabing pepauli ning pangakulung na king marinat at pipitang sukulan. King marangle karin ya manuknangan, malapit king kamposantu ring intsik. E makyabyayan kaninu man, pangilagan de ring sabla uling tatakut lang myawa. Malunus ka nung akit me ing kubu na! Kubu neng giring-giring: ing angin, ing uran at ing aslag ning aldo timawang Iwal-lungub a katulad ning karayum neng manai kang imalan. Binawal deng tagkil king nanu mang banding balen. Misan, ing metung a yanak menabu ya king metung a paligi. Ing paligi e ya binang malalam. Mikatagun naman lalabas ya ing leprosu at sinopa’neng misaka king kanal ing anak. Abalu ning tata ning anak, sinumbung ya king gobernadorcillo. Iti naman pepabarug neng anam a ukdu libutad ning dalan kaybat pepaduluk ne ing yantuk a pemaluka ra. Metung a kalapastanganan a yalang lagyu! Milayi ya king sakit ing leprosu at ing babarug tegal ne pa kabang ing gobernadorcillo gugulisak na pang — "Dakpan ye!
