"Ing usuk yu mayap dapot masakit tukyan. E ku malyaring isulung ing kakung tangka ita mo sang e inanalumpakan kaniti ing metung a ligaleg? E wari malyaring ing mayap sumulung busal ning sabla, ngening ing katutwan c mangaylangan manandam balatkayu king kamalyan?”
"King uli na nyan, alang bisa king katutwan a lubas!” nganing matwa. "Mayap mu ita nung sasabyan, malilyari king yatung paninapa'ning kayanakan. Oyan ing guru king eskwela a migmalasakit dili-dili na; pusung anak a mignasa king kayapan dapot ing apupul na sunu mu at kalibakan. Sinabi yu kaku king metung ko waring dayuhan king kekong balen, at iti paniwalan ku. Ibat pa king mumuna nang aldo ning kekong panyatang, migmula yu nang sinugat ing pamagmaragul ning metung a pari o pikabalwan anti mong santo karing tau at anti mong byasa karing kalupa nang pari. Ipayntulut na sana ning Dyos king iting bage aliwa ing matul king kekavung payntungulan! E yu isipan ing pauli na ning ding dominikos at ding agustinos palkaran de ing abitung ginggun, ing kuldun ampon ding matsurang sapatus, pauli na mu ning aganaka na misan ning metung a matenakan a Santo Tomas king ing Papa Inocencio III binilang no ring tuntuna’niting Kapisanan anti mong makabage mu karing babi at e karing tau, deti e la miyagumagum ban patunayan da ing gingkas ning metung a talapanaral inyang ngana: "Ing lalung alang ulagang paring mangmang makarapat yang maygit king kapamahalan kambe ring sablang kawal na niti. Mimingat ka magkang mabaldug ka: (Cave ne cadas!)” Ing gintu tutu yang mayupaya; ing biserung gintu bildug neng maralas ing Dyos karing kayang dambana at iti ibat ketang panau’nang Moises."
"E ku binang mapanisip marok at e ku isipan binang mapanganib ing bye king kakung balen,” nganang mekibat makatiman Ibarra. "Babalakan ku king deng kapigaganakan migit la king katutwan at pagnasan kung malyari ko ngang abalayun ding kakung tangka at e mika maigpit a kapanalansangan king dane ita.”
"Wa, nung ila yabut de kekayu ing gamat da; at ali, nung yurung de. Ing sabla yung pamagkapilit misagka at malasak mu karing bakud a pader ning kumbintu king kapamilata’na ning ditak mung igut ning praile king kayang kuldun o ipagpag nya mu ing ka-
