mulang!” nganang mitmung panandam; “at ngeni ing
mumunang yusu’ku kekayu ya ing e na ko daratang
ban mangutang pa kanaku!”
Ing bayntau magmulala neng linawe ing matwa. “Pablasang ding taung masalese pamisip,” nganang mapait migsalita, "isipan dang mamulang kayu naman. Ding tau, isipan dong mamulang detang e ra kalupa pamisip, uli niti makanyan kung isipan da, at pasalamatan ku la pablasang, kalulu na kung da! Nung mabisa kung magbalik misip katulad da nung datang itang aldo ita leko ra kaku ing ditak a inablayan ku king makabalitang sarili kung pamisip. At ninung makibalu nung ila ing ating matulid? E ku mimisip at mabibye agpang karing karelang kautusan; ding kakung ugali, ding kakung tagimpan aliwa la. Ing gobernadorsilyo pikabalwan yang metung a taung byasa karela pablasang ala yang aliwang abalu nune ing miyampang tsokolati ampon ing mibata king dawak na panugaling Padre Damaso at ngeni masalapi ne, abalana'na pa ing karatunan ding kayang kalahi at neng misan manyabi ya pang dikil king hustisya. 'Oyan ing taung matalino,' ngarang mimisip ding malda, ‘Ion yu, ibat king ala ikwa nang meging maragul a tau!' Dapot aku, mekamana kung pibandyan at mayap a kabilyan, megaral ku dapot ngeni metung kung kalulu a e ra pepanibalan agyang king palalung makalunus a tungkul, at ding sabla ngara : 'Yan metung yang mamulang: yan e na balu ing bye.' Ing kura awsa'na kung pilosopo anti mong sunu at payntindi na ing metung kung masalita a mangaya king apagaralan ku karing unibersidad, ngening king katutwan iti ya ing lalu kung e pakinabangan. Malyaring aku pin ing mamulang at ila ring byasa, ninung makasabi?”
Ing matwa piling ne ing buntuk na at anti ne mong tatabi ing metung a bage isipa'na. At nganang tinuglung:
“Ing kadwang malyari kung yusuk kekayu ya ing kutnan ye ing kura, ing gobernadorcillo, ding sablang taung maki katungkulan : deti dinan da kayung marok, mangmang o alang ulagang usuk, dapot ing mangutang e na buring sabyan ing mamintu, kanwari tukyan yu la angga mu ring ating pyupayan at pabalu yung daraptan yu mo ing usuk da.”
I'lbarra misip-isip ya at kaybat ngana:
