Kabang pagmatulan da ring menalbe ing masayang keulya'na ning labanan a minye atul king malwat nang panaun a pyamanwan a kisnukan da na ring mingatbang panig, ing bigla rang panyatang ding apat a guardia civil at ing sarhentu ra, mekalingasngas ketang sayahan at mekabalisa karing babai uling magdala lang pusil a maki bayoneta.
"Alang kikimut. nganang ginulisak ning sarhentu. "Ing kimut, pabaril ke.
Babo ning pepakit nang kayabangan ning sarhentu, tinikdo ya i'lbarra at lepita'ne.
"Nanung buri yu...?” kitang na.
"Ibye ye kekami ngeni mu rin ing marok a taung (criminal) milagiwan Elias, ing pilotung midalakit kekayu keti nanding abak. . nganang babala.
“Marok a tau. . .? Pilotu. . .? Magkamali kayu. . .!” nganang Ibarra.
"Ali kami ... at yang Elias a yan makadalum ne naman uling timpalasana’ne ing metung a pari...!"
"Ah ! at ita ya ing amanwan yung piloto. . .?”
"Ya kabud, agpang king sabi ra. Tatanggapan yo kareng katatagan yu deng taung e mayap, ginung Ibarra."
Linawe neng Ibarra babo’t lalam at nganang kinasnuk:
"E ku kaylangan pang pabalu kekayu ing nanu mang daraptan ku. Karing katatagan mi ing ninu mang tau malyari yang makipagdamut at agyang ikayu man, nung dinatang kayu mu, mika dake kayu naman sana king mesa anti mo ing kekong alferez a kayabe mi atin pamung adwang oras.”
Giluta’ne kaybat nang sinabi iti.
Ing sarhentu kininis no ring punta nang bigoti at ketang masakit nang pangabili ala neng bailing daptan inya ring sundalus na ilang inarapa'na at inutus nong salugsugan de ing payntunan da angga karetang mangaragul a dutung ning pulu at darala ne king kapirasung papil ing tandang panguntayran da king taung darakpan da.
"Lon yung mayap ing tanda nang amanwan yu ning taung panintunan yu uling ding keraklan karing
