memalen makanyan la itsura. E ko paypagkamali. . !”
nganang Don Filipo.
Inyang ala lang akarapat mibalik la ring sundalus at sasabyan dang e la menakit metung mang tau o bangkang makapagsalupsupan at ing sarhentu bulungbulung ya kaybat mebating nya't sukat nung makananu yang limput. Sadyang ugali ning Guardia Civil. . .!
Ditak-ditak migbalik ing sigla at minuran king myayaliwang kutang at satsatan ing pisasabyan.
"E kasi yan ya ing Elias a minugse king pari ketang labak nganang mimisip sinabing Leon.
“Makananu ing milyari, ha? makananu. . .?” ngara naman ding masulisita.
"Sasabyan da, ketang bula'ning Setyembre, misan a yaldo masikan ing uran, asalubunga’ne ning alferez ing metung a lalaking mamusan dutung. Ing dalan mitmu yang burak at keta mung gilid karin la midalan ding tau. Uling makitid yang tutu, katau ya mu ing malyaring milabas. Sabi ra, lugal a tuknang ya ing alferez, sinikad ne pa ing sasakyan nang kabayu at gilisaka’neng paurungan ing tau. O neng iti e ne pikabyang uli na mekad ning mabayat nang pusan, o e bisang mitalmak king burak, at sinulung ya. Mikapali ya buntuk ing alferez pignasa'neng padamusak king kabayu na, dapot ing lalaki kinwa ne ing metung a dutung at berug neng masikan king buntuk ing kabayu at ing alferez miyugse ya king labak. Sabi ra naman sinulung ya ing lalaki anti mong alang milyari bista' man beril ne mekatalima ning alferez king kanwa na. Anti ning e ne bitasang akikilala itang lalaki, inukul da na ya ing balitang Elias ita a dinatang king lalawigan ati’nang pilan bulan at e ra balu nung nu ya ibat at abalu re ding guardia civil karing aliwang lugal king anti kanitang dapat na.
"Tulisan ya pen. ..? nganang kinutang mangaligkig Victoria.
"E ku paniwalan uling misan a yaldo akabunggu no ring tulisan inyang deti liban de ing metung a bale.”
“E ne man lupang marok a tau. ." nganang Sinang.
