nung nanung sabya’na. Deti naman e la bubulad at
panayan deng magsalita.
“Nanu ya ini. . .?” ngana bandang tawli at diklut ne ing malating libru at lalon-lalwa’ne.
“Ing Gulung ning Kapalaran, metung yang aklat king metung a pyalung,” ing pekibat nang Leon.
“E yu balung kasalanan ing maniwala king bage anti kanine. ..?” nganang mwa at pengisi ne bilungan.
Misdan la't mengapamulala ring sabla at karing labi tinakas ing sukal lub.
"Lalung maragul a kasalanan ing siran me ing e keka king e na kaburyan ning maki bandi. . .!” nganang tinalakad Albino. "Padre, yan awsan dang kapanakawanan at ing Dyos ampon ding tau babawal da yan. . .!”
Pidaup nong Maria Clara ring gamat na at lalwa'ne karing maglwa nang mata itang mitagan pa king librung nandin pamu minye king tula na.
Pigmulalan da ring atyu karin ing e ne pekibatan i’Albinu. Lalwa'nang Fray Salvi itang sulasulapo mengagising papil a mipaid king pulu at king danum. Kaybat likwa’na la, paid-paid at ding adwa nang gamat makatumpak la king buntuk na. Tinuknang ya sinaguli ban makisabi kang Ibarra a minatad kaya angga karetang saken a manaya karing anggang mekipagpiknik.
“Mayap na ping mebating ne itang lupang makatakut a ita.. . nganang bubulung Sinang. “Ustung Iwa’na ka, ngana wari: 'E ka mayli, balu ku ing kasalanan mu . . .!
Kaybat neng binye king kapalsinta na ing regalu na metula yang tutu i’lbarra at e na na papansingan ing pamakyalung nang ahedres.
Ing keulya’niti, bista’man e na na sasamasan Ibarra, magkasakit ya pa i’Capitan Basilio at ikwa na mong mekipatas. “Nung makanyan, yurung ne ing dalum. . . , yurung ne. . .!” nganang masayang Capitan Basilio. “Yurung ne pin ing dalum. . .!” nganang minulit Ibarra, "Nanu man ing kayatulan a ibye ra ring Ukum. ..!”
Mitalanan lang gamat matalik a matalik.
