"Paten ke ing Ari..." nganang Ibarra.
"Selikut neng Capitan Basilio ing Ari na king gulut na ning Reina.
“Paten ke ing Reina...!” nganang babalang Ibarra kabang tatalna’ne ing tori na (torre) uling sundalus ya mu ing manlwalu king Reina.
Anti ning e ne asalikut ing kayang Reina at e na neman aurung ati’neman king gulut na ing Ari, menyawad yang panaun i’Capitan Basilio ba'nang pagaralan mayap ing bili na.
"Matula ra kong dirinan panaun misip. . .nganang Ibarra uling atin yang sabyan karing mapilan ketang kapulungan ding kayanakan.
Tinikdo ya at dinina'neng labing limang penandit ban misip ing kalaba'na.
Tatalna'neng Iday ing gulung a kartun a nung nu makasulat ing apat a pulu't walung kutang kabang i'Albinu ya naman ing tatalan king aklat da ring pakibat.
"Kalaraman, e tutu, kalaraman. . .!" nganang sasyo maybug kyak Sinang.
"Nanu ing milyari . . .?” ing kutang nang Maria Clara.
"Isipan mu na. . . , oyni ing kutang ko: ‘Kapilan ku mika isip ...?’ Peparugang ko ring dais, at yan, yang mahuehue mag-paring yan, binasa ne ing libru : 'Potang mika bwak la ring tugak.. .!' Ngamu paya kanyan. ..?”
Pengisngisa’neng Sinang ing mayling mag-pari.
"O ninu naman ing minutus kekang ikutang mu ita. ..?” nganang Victoriang pisa'na. Kitang mu ita manupaya ka king pakibat. . .!”
"Ikayu naman ing kutang,” ngara kang Ibarra at binye re kaya ing dugang. "Pikayari ming dinan miyang galal ing ninu mang tanggap masanting diling pakibat. Mengutang na ke ngan.” "O ninu ing manikwang galal. . .?”
"I Maria Clara, i’Maria Clara. . .,” nganang Sinang. "Bisa ya’t e ya bisa, oyni ing pepakutang me : 'Tapat ya at e mangalingwan ing kapalsinta mo. . .?' Ing pakibat ning libru oyni...”
Mengalare ya i’Maria Clara, tikpa’ne asbuk i’Sinang at e na alud ing buri nang sabyan.
