"Makamal...," nganang Ibarra inyang ikit neng menimutla ing alferez. "Buri kung abalu ing pamalak yu kanining buri kung daptan dikil kaniting bage. Ukulan ke sanang ipaulu itang babaing ita king metung a Doktor, at king kasaupan yu naman at usuk panintunan ta la ring anak na. . ."
Mibalik la ring utusan a tinagal king babai at sinabi rang e ra ne ikit at iti yang peparimla king pamitaltalan ding adwa katau. Inaliwa ra ing pisasabyan.
Kayari ning pamangan, kabang pamye ra ing tsa at kape, ding makatwa't kayanakan misalbag la at pulung ning maki pulung. Ding mapilan myalung lang ahedres, ding aliwa naman misugal la dapot ding kadalagnan, pauli ning ugali rang masulisita, memamye lang kutang king "Gulung ning Kapalaran” (Rueda de la Fortuna).
"Meko keni, ginung Ibarra. . .nganang masayang minaus Capitan Basilio. "Atin katang pisasabyan a ati'nang labing limang banwa ngeni, at alang Ukum king munisipyu a makayatul kaniti. Alben ta nung alutas ta iti king pyalung a ahedres!"
"Ngeni mu rin at buri kung buri yan . . nganang Ibarra. "Saguli mu, mamako ne ata ing alferez."
Ding mangatwang byasang ahedres agad dong pepadurutan ding milaban angga na detang e byasa king pyalung a iti. Ding matwang babai naman yang pepatulugan da ing cura at pengutnan de king bage-bage makarikil king pamunta banwa, dapot i'Padre Salvi inukul nang aliwa ing lugal at panaun ita ban patnubayan na la king kukutang da, inya alang masala king pakibat na at detang mata nang malungkut at papakit maki mwa, aliwa la lalon at halus e no pansing ding kasabi na.
Migmulang tahimik ing labanan da.
"Nung patas ing Iwala’na ning pyalung, kaylangan yurung ya ing dalum. . . ," nganang Ibarra.
Kasalukuya’ning pyalung, tinanggap yang telegrama i'lbarra. King uli ning telegrama mengamulagat ya at menimutla. Tiklip ne ing tinggap na at lila'ne king pataka na, kaybat linawe no ring kayanakan á masiglang mikayli kabang pakibalwan ning balang metung ing kayang kapalaran.
