“Caramba, padre. . .nganang memulalas maki sunung ayli ning alferez, at pagmatula’nang mekayablas ya. "Mebating la mu ring mapilan yung pesus, padre, maranun a maranun pepagising yu ne ing sarhentu ba’nong panintunan dapot ala kong binggitan kaku nanu man dikil kaniti. At ikayu man, ginung Capitan, tutu pin ing ikayu man...”
E na belaus ing buri nang sabyan mine meyli nyamu at kinayud ne ing kutsara na king malare kapayang labuyu.
E na balu ing dapta'ning cura at king pangataranta na nganang na mung mekibat: "O neng aku ing makibat karing kwaltang mebating. . .”
"Masanting a pakibat, kagalanggalang a pastul ding kaladwa,” nganang sinalabat ning alferez kabang tatamwal ya king kapayang kakana’na. "Kasanting ring pakibat, banal a lalake. .
Bisa ya sanang mamilatan i’lbarra dapot migkapilit ya i'Padre Salvi at nganang mekibat makatiman a pigawa:
“At balu yu ginung alferez, nung nanu ing sasabyan da dikil king pangawala ra ding anak? Ah! e yu balo. ..? Ba’t e yo kutnan ding sundalus yu. . .?” "Nano.. .?" nganang misdan ning alferez at mebating ing tula na.
"Sasabyan da king ketang kabengyan a mewala la atin lang dimdam a akbung. . .
"Akbung. . .?” nganang minulit ning alferez at saka no linawe ring karungut na.
Deti tatangu lang e bubulad.
I Padre Salvi kanita nganang migsalitang banayad at mitmung salpak:
"Lon yu na, kanyan mayayakit ing basta na e yo ararakap ding e map a tau, e yu man pala balu nung nanu ing malilyari kilub yung bale. Saka pota bisa ko pang mamanaral at tuturu yo pamong tupad king tungkul da ring aliwang tau . . .? Mekad naman balu ye ing diparan king kastila a ngana: Agyang ing mamulang mu balu na naman ing king pibalebale na . . ."
