"Kanwari mo mwa ka at e me pakisabyan.. .,” nganang Sinang kang Maria Clara. "Bungilan me bayang manugaling mayap...!”
"E na ka man mabagsik...nganang Iday.
“Kaylangan ping mag-mabagsik ka, ika pala...! Ing kakaburi mu sukat yang mamintu anggang kakaburi me pamu uling potang myasawa na kayu, ay! dapta'na ing buri nang daptan...!” nganang minusuk Sinang.
“O’t mo balu mu yan, anak...?” nganang kinutang Victoria, ing pisa’na.
“Sst ... e ko maynge, oryan na ...”
Daratang no pin kanita ring kasapunggul a lalaking tatalan sulung-bulu at lalakad lang tutukya’na ning kalingking ning metung a gitara.
"Balamu naman tigtig magpalimus...,” nganang Sinang at saka ya meyli.
Pamisalubung da, ring babai ila mo ring e buladbulad at e man mayli kabang ding lalaki salita nong salita, pigayan da la, pakaylyan da la at king dakal dang kukutang halus e ro pakibatan man.
"Maratun ya ing malating dayatan, (lagoğ)...? Masalese kaya ing panaun...?” ngarang kinutang ding pengari.
"E ko migaganaka, byasa kung kawe..., ngana ning metung a bayptaung matas dapot payat.
“Ing bage sana sinimba ta pamu...!” nganang Tya Isabel at saka no pidaup ding palad na.
“Atin pa pung panaun, ginang. I'Albinu pu ketang panau'na mag-pari ya inya makapagmisa ya king bangka...!" ngana ning metung at tiru ne itang matas at payat.
Ing payat inyang ikit nang yang tuturu ra, pablasang pusakal ya, migbanalbanalan ya at pekyapusa'ne itsura i'Padre Salvi.
I'lbarra man, babo nitang katutubu nang mahalan a panaske, makyamut ya ketang masiglang pamipagsalita ring kayabe na.
Inyang miras la king pangpang, misdan la ring babai uling disan da la ring adwang bangkang misasapang at makagayak. Makabitin la ring mangulate ta-
