naman a penagawlan bulung at sampaga at imalan a
maki kule myayaliwa. Makabitin la naman ding parul
a belutan papil ketang bubung ding bangka pilatan
ding rosa at clavel. Makapag la ring dakal a prutas,
pinya, kasuy, sagin, byabas, lansonis at myayaliwa pa.
Dela nong Ibarra ring alfombra na, takap katri, at
sapinan luklukan (cohines) ban ding babai e la magkasakit
lukluk. Ding tikin at bagse maki panagawla la
naman. Ketang bangkang magayak ating alpa, gitara,
kordyun at tambuli. Ketang metung naman mamapi
la ring kalang uling karin da lulutu ing tsa, kape at
salabat king almusal.
"Keni la ring babai at ikong lalaki karin kayu...!” ngara ring pengari kasampa ra king bangka.
"E ko magalo... lukluk kong maratun pota mityab tamu! ”
"Mangurus ko pamu. . .nganang Tya Isabel at minuna yang mengurus.
"Ikami mung dili mi kene. . .?” nganang kinindat Sinang. "Magdili-dili kame. . .? Aray...!” Ing aray! pepasari ne ning kandut nang Ima na. Malale lang kinusad ding bangka king maratu’nang salu ning malating dayatan, at ketang salami'ning danum mayayaninag ing aslag ding sulung papil. King aslagan mumunag ne ing alaya.
Laganap ing katahimikan. Ing kayanakan a sigsag ding mangatwa ala yang bulad kabang itang balisa nang kaysipan lilipo yang pipi.
"Mimingat ka.. .nganang Albino, ing mag-pari, king katau. "Itimid neng mayap keng bitis mu ing sumpal nyang busbus keng tulid mu...!”
"Bakit...?”
"Ustung milako ya sumpal, lungub ing danum. Dakal ya busbus ing bangkang ini..."
“Sus.. . lumbug tamu... lumbug tamu...” ngarang meliswas ding babai.
"E ko paygulu, ginang, lima ya mu busbus ing bangkang ini at e la makaing mangaragul.”
"Lima busbus.. .? Dyos ku po...! Buri yu keng mangalumod. . .?" ngarang gugulisak ding babai.
"Lima la mu, ginang, anti la kanini dagul...! at pibilug no ring taliri nang tindaragul at tuturu.
