King banwang asul kikindat la pa ring mengalingaldo batwin at ding ayup tahimik la pang matudtud karing sanga ring tanaman inyang ing metung a pulutung ding taung masaya lilibutan do ring dala'ning kabalenan magdalang bulung-kwayan a yawsan dang huepes, at paike la king malating dayatan.
Lima lang dalaga ring masalusung lalakad, taid-taid la gamat o makatalan king anakan, tutukyan da ring mapilan a matwang babai at ding utusan dang mamuntuk salikap a mitmung kanan, pinggan at aliwa pa. Kabud atiglapan mo ring mayli rang lupa retang kadalagnan a manalig king malagung kabukasan, kabud atiglapan mu itang malabung at matuling dang bwak a sasabug ning angin a mamyalungan at ing malapad dang pilegis ding bistidung susulud da, balamu wari manakit kang malinang a dyosang tatakas at e bisang abuta'na ning sala ning aldo. Deti ila ri Maria Clara, Victoria, ing mataras nang pisan, ing malagung Iday at ing mahinhin at pihikan a Neneng.
Misabisabi la, ngara nang mayli, mikandutan, misitsitan at biglang qalapak.
"Hoy! gisingan yo deng taung matudtud pa...!" nganang babawal Tya Isabel. "Inyang ikeng dalaga e na ke man magulung makanyan.. .!”
"At e na ko man mangalingaldo katulad mi at ding mangatwang lalaki e no man matako tudtud...!” nganing malating Sinang.
Menahimik la sinaguli at beba ra ing siwala ra, dapot ita sinaguli mu uling mibalik na naman ing sagakgakan, inge at siglang kakatmu king dalan ketang siwala rang masaya at matarling.
