nang bale, adwananan deng inuman at ampanganan
deng mapilan asan. Ngening lumabas la king kayang
lele, balamu apapatu re at adadamusak, at ding karelang
panlalawe, malulunus o malkara, lalput la wari
king kayang panyu at panasakitan de lupa.
Bandang tawli, ring byahero mirayu na la at i’Sisa mengisnawa ne. Bisni ne sinaguli ing panyu ba’nang Ion nung marayu la pa king balen. Mapilan la pang asyas telegrapo ring makatagan bayu la miras king bantayan. Kapilan man e ne abalak makanyan ya dayu ing kekaban a ita.
Ketang lelaya'ning dalan tutubu ya ing malabung a pun kwayan a nung kaysanu lilung paynawa ya karing milabas a panaun. Karin, malugud neng pakisabyan ning kayang kapalsinta; sasaupa'neng magdala king salikap nang bunga at gule; ay! ita linabas mung an ting paninap; ing kapalsinta meging asawa ne, at ing asawa gewa reng cabeza de barangay, at ibat kanita ing ligalig migmula nang tinuktuk king kayang pasbul.
Anti na ning ing aldo magmula ne pali, kitnan de ring sundalus nung bisa yang paynawa.
"Salamat, ali ku!” nganing mitatakuta’nang pakibat.
Dapot nung nu ya lalung mitakutan ya itang milalapit ne king balen. Mipnung pamigaganaka, miglinguslingus ya misusumangid: mangalapad a palayan, metung a malating kanal paranum, dutung a managipus; ala mang metung a balisbis o metung a batu a nung nu na ibagsak ing sarili na. Sisisya'na ing pamanuki na karing sundalus angga ketang karinan a ita; paninintuna'ne ing malalam a ilug a mamagus lele nang bale, a nung kaysanu ring mangatas nang pampang kalat lang mangatilus a batu a mamampang misnang yumung kamatayan! Dapot ing pamigaganaka karing kayang anak, king anak nang Crispin a e na pa balu nung mipakananu a ngga ngeni, pepasala'ne isip ketang benging ita, at nganang panatag bubulung king sarili na:
"Kaybat. . . kaybat mako kami at manuknangan king kabubusala'ning pulu!”
Pinulis no ring mata na, peyapa na ing sarili na at minarap karing guardia, nganang maynang minyabi:
"Ati'ta na king balen!”
