Mapilan mung penandit, linub yang makabusangit ing gobernadorcillo. Ya ing ikit tamu napun a mamitbit kabuntun a kandila. Kalub na tinuknang ngan ing bulungan, memaglukluk la at ditak-ditak mitahimik. Linukluk ya ing Kapitan (gobernadorcillo) king tabureting maragul lalam nang larawan ning Ari España, menguku yang apat o limang ukdu, inapis ne ing buntuk na, kaybat ing lupa, simpa no ring adwa nang siku babo ning mesa, kildas nong pepasibayu, menguku ne naman at yan ulit-ulit.
"Makamal,” ngana bandang tawli ketang mamayomayo nang siwala. “Pengangasan kung tinipun da ko ngan king pulung a iti. . . ehem! ehem! (menguku ya) uli ning kapagmasusyan a daptan tamu king kekatang mal a santu (patron) i’San Diego keng dosi ya iting bulan. . . ehem! ehem!”
Ing masikan at matalik a kuku tiknang neng magsahta.
Tinikdo ya kanita ing metung a matikding lalaki king lupung ding makatwa a ati’nang apat a pulung hanwa. Iti ya ing mabanding Capitan Basilio, meging kalaba’neng Don Rafael. Ya ing sasabing kamate nang Santo Tomas de Aquinas, ing yatu e ne sinulung katakbangan man Ya naman ing sasabing manibat ketang linwal ya king San Juan de Letran, ing ketawan migmula neng minurung.
“Ipayntulut ning kamalan yu ing magsalita ku dikil kaniting bage tutung maulaga,” nsana. "Muna na kung magsalita bista'man waring ding aliwang atyu keti atin lang matulid labis kaku, dapot nung mumuna ku mang magsalita, iti e na buring sabyan ing aku mayap ku kesa karing aliwa at ing tawli naman ibilang ta ya mong pugit. Ali, e makanyan. Ining kanakung iparamdam, tutung maragul a kabaldugan at e sukat malakwan o masabing tawli, nung inya mu migpauna ku ba'ku mung apatalinting mayap ing bayat na ning sabyan ku. Ngeni, payntuluta'na ku ning kamalan yu ban munang magsalita keting kapulungan a tegunan da ring taung tutung pikabalwan anti mo ing gobernadorcillo, anti mu naman ing milabas a Capitan, ing makapasubali kung kakaluguran, i’Don Valentin, a meging Capitan, mu naman, ing kepara kung anak, ing balitang Pekapun da i’Don Melchor at aliwa pang e ku na saglawayan
