—Nalabit ngata, seniora—insungbatna;—ngem awan pay nakakita inggana ita iti urnok da.
—?Awan urnok dagita a tumaytayab?
—Atapek nga add a met ngata, ta no awan, daksanggasatda kuma unay.
Ni Maria Clara dina nadlaw ti naliday a panagbalikas ti mangyurit kadagitoy a sasao.
—?No kasta?
—Kunada, seniora,—insungbat daydi agkabanuag,—a saan a makita dagiti um-umok dagita a tumaytayab, ket adda pannakabalinda a saan a pannakakita iti bagi dagiti addaan kadakuada; ket, kas ti kararua nga isuna la a makita iti nasin-aw a sarming dagiti matmata, kasta met a iti laeng-sarming ti danom ti pakakitaan kadagita nga um-umok.
Ni Maria Clara nagpanunot.
Idin, nakadanunda iti yan ti maysa a pasabing; daydi lakay nga agbangbangka inggalutna daydi bangka iti maysa a kawayan.
—!Agurayka!—kinuna ni ikit Isabel iti anak daydi lakay, iso nga agsagsaganan a umuli a siiggem iti sagap wenno kawayan nga adda iketna—masapol a masagana metten ti pagabrawan tapno dagiti ik-ikan, no maisang-at iti danom, agtartarusda iti tayab.
—!Nagimbag ket din ni ikit Isabel!—kinuna daydi seminarista;—dina kayat a ti ikan inna panawan ti danom iti uray la no apagapaman.
Ni Andeng, daydi kinakasuso ni Maria Clara, nupay nadalos ken naragsak ti rupana, agdindinamag ti laingna a lumuto. Nangisagana iti nagarasawan iti bagas, samatis ken pias, a daytay tultulungan wenno singsingaen dagiti sumagmamano, a nalabit agarem. Dagiti babbalasang agim-imaritda iti rangaw ti karabasa, sili, ken bunga ti utong (paayap) a putputdenda iti kas katitiddag ti sigarilio.
Tapno mailiwliwag ti ganat dagiti mayat a makakita iti iruruar dagiti ik-ikan iti nakaipupukanda, a sibibiag ken agkiwkiwikiw, ni nalibnos a Iday innalana ti arpa! Ni Iday saan la a nalaing
a tumukar iti arpa, ngem nataraki pay unay dagiti ramramayna.
