Mitauli canacu ing dalang calacal
mecad anga bucas carin pamu datang
at nung é macanian ing canacung daptan
caeung salubunĝan lual ning balayan.
Pequibat nang Abu nung macanian nĝana
ing bucas nang abac salubungan mu na
nĝeni carampatan queti ca painaua
saca na ca maco mararalumdum pa.
Alang nanu-nanu miras la't mirantic
qñg bale nang Abu cayagnan deng menic
iniang milucluc ne qñg Sultan migsulit
nĝana ó catutu é ca binang mainip.
Mecad mapun tana é binang mabalam
canining balac cu ti'na ca danupan
ali cu nĝana mo ning matas á Sultan
dapot mepagal cu canitang lecaran.
Cang Abung pequibat macanian man ngana
mapun tamu pa mu bayu ca painaua
pangasabi niti agad inutus na
yapag dang apunan qñg ba'nang manĝanla.
Mitutulid la ping linueluc qñg dulang
ing pamagsalita ali ra tutuenang
pamaninum alac macanian mu naman
maragula tula alang pianganan.
Niti nan mong Sultan baquet caya ngana
inaniajan mu cung é mu caquilala
ing binte nang Abu iti ugali na
ding é tau queti agad ampanĝan la.
