- ( 21 )
Pablasang ala pin metung mang linapit
iti nang y Abu tiniedo yang pilit
indu nang tatacut biglang mengulait
ding siping dang bale inagad lang menic.
Ing bigung y Abu pisasaupan da ya
binang macatacut dagul ding mata na
asupil dia mu rin uli ning daca'la
layun da lang telian ding gamat bitis na.
Ucul da ding sabla tune yang mamulang
itang pinialung dang sira capalaran
iniang aquit da pin é miquilus dit man
inagad misubli mebating dang tapang.
Ting siping dang bale qñg indu quitang na
ing sanca'na't bague ning pangamulang na
ngara ding aliua mecad dinanup ya
yang meguing dalan qñg panĝacania'na.
Binte na ning indu mecad é macanian
é ya pa meranup aguia mang capilan
yang uculan cung miliaring iti nan
ing pamalsinta na ya galang ing sangcan.
Quetang pisabi ra lacuas yang memuanĝit
ing bigung y Abu gapus na matalic
inia mebigla yang mequibat mapilit
gapus cu ilaco qñg bayu nang aquit
Ali cu mamulang acung quecong Sultan
pun dang tutuquian ding sablang musulman
y Harum Alraschid ing laguiu cu naman
á alang capante Monarcang gagalang.
