- ( 10 )
Ati'na que queni at panayan da ca
manungue na ca ugali tang sadia
qug pangatudtud mu ing mibangu'na ca
at ing dios Alah qñg ban purian ta ya.
Pangasabi niti deta ning oficial
ampon detang Dama linub lang agaran
ding sablang detinan quea lang imasdan
nitang mecasilip á tune rang Sultan.
Pablasang horas na ning pamanalangin
metung á oficial lepita'neng tambing
tin yang pepabáu tudtud na maimbing
qñg bagsic na niti agad yang mig-jaching.
Misdan ya y Abu biclat nong mata na
migmulala ya lub canitang iquit na
pablasang siping ne ing cetro't corona
at binang masanting itang susulud na.
Maulagang catre ing queang pagqueran
ala yang calupa guintu yang binuldan
sutlang colgadura ing pácasabit ngan
at macasilo ya ninu mang timanman.
At itang alfombra sutla ngang laganas.
ating pacapinta mialiuang bulaclac
at saca ing banglu á carin cacalat
uling manibat pin canita ning asap.
Lele na ning catre macapatulug la
detang misnang lagu at dacal á Dama
mipagtalan la ngan tungal tungalan la
laud at cítara guitarra't banduria.
