Page:Constitution of the Cherokee Bible Society.pdf/4

From Wikisource
Jump to navigation Jump to search
This page has been proofread.


ᏍᎩᏃ ᏁᏙᎲᎾ ᎢᎨᏎᏍᏗ, ᎤᎾᏑᏰᏍᏗ ᎨᏎᏍᏗ ᏗᎪᏪᎵᏍᎩ ᏓᏂᎳᏫᎥᎢ ᎢᎪᎯᏛ ᏧᏃᏪᎳᏁᎯ—ᎾᏍᎩᏃ ᎯᎠ ᏗᎪᏪᎵᏍᎩ ᏄᎬᏫᏳᏒ ᏗᎪᏪᎵᏍᎩ ᏭᏃᏁᏗ ᎨᏎᏍᏗ ᏄᏍᏛ ᏚᏂᎸᏫᏍᏓᏁᎸᎢ. ᎥᏝ ᎠᏗᎾ ᏗᎧᎿᏩᏛᏍᏗ ᎬᏩᏙᏢᏗ ᏱᎨᏎᏍᏗ, ᎥᏝ ᎠᎴ ᏗᎬᏩᎾᏑᏰᏍᏗ ᏱᎨᏎᏍᏗ ᏧᏂᎸᏫᏍᏓᏁᎯ, ᎥᏝ ᎠᎴ ᎬᏩᎵᏁᎢᏍᏗ ᏱᎨᏎᏍᏗ ᎪᏪᎵ ᏗᏩᎯᏍᏗᏱ ᎠᎴ ᏗᏰᎵᎯᏍᏙᏗᏱ; ᎤᎳᎪᎭᏍᏗ ᏓᏂᎳᏫᎥ ᎤᏩᏒᎯᏳ ᎾᏍᎩ ᎢᏳᏍᏗ ᏗᎬᏩᏂᎸᏫᏍᏓᏁᏗ ᎨᏎᏍᏗ, ᎠᎴ ᎾᏍᎩ ᎤᎳᎪᎭᏍᏗ ᏓᏂᎳᏫᎥ ᎤᏂᎲᏛ ᎨᏒᎢ—ᎠᎴ ᎾᏍᎩ ᎯᏍᎩ ᎢᏯᏂᏛ ᏧᏂᎸᏫᏍᏓᏁᎯ ᏧᏂᏒᏍᏔᏅᎯ ᎨᏒᎢ.

ᎠᏯᏙᎸᎢ 7. ᎠᎾᎵᏍᏕᎵᏍᎩ ᎪᏪᎵ ᏗᏂᏰᎵᎯᏍᏗᏍᎩ ᏑᎾᏓᏡᎩ ᏗᎦᎪᏢᏂᏓᏍᏗ ᎨᏎᏍᏗ ᎠᏂ ᏣᎳᎩᏱ—ᎾᏍᎩᏃ ᎾᏂᎥᏉ ᎩᎶᎢ ᎠᎾᎫᏱᏍᎨᏍᏗ, ᎠᎴ ᎠᏁᎳ ᏂᎦᎵᏍᏗᏍᎨᏍᏗ ᎠᎾᎵᏍᏕᎵᏍᎩ ᎤᎾᏓᏡᎬᎢ, ᎾᏍᎩ ᎾᏍᏉ ᎠᏁᎳ ᏂᎦᎵᏍᏗᏍᎨᏍᏗ ᏄᎬᏫᏳᏒ ᏧᎾᏓᏡᎬᎢ.

ᎠᎾᎵᏍᏕᎵᏍᎩ ᎪᏪᎵ ᏗᏂᏰᎵᎯᏍᏗᏍᎩ ᏚᎾᎿᏡᏩᏗᏒ ᎠᏕᎸ-ᎠᏂᎦᏘᏯ ᏚᏂᎧᎮᏍᏗ, ᎠᎴ ᎾᏍᎩ ᏚᏂᏍᏆᏂᎪᏕᏍᏗ ᎠᏕᎸ ᎯᎠ ᎾᏍᎩ ᎠᎾᎵᏍᏕᎵᏍᎩ ᏚᎾᏓᏡᏩᏗᏒ ᏧᎾᏤᎵᎦ, ᎾᏍᎩ ᎠᎴ ᏫᏚᏂᏲᎯᏎᏘ ᎨᏎᏍᏗ ᎠᏕᎸ-ᎠᎦᏘᏯ ᏄᎬᏫᏳᏒ ᏧᎾᏓᏡᎬ ᎤᏂᎧᎲᎢ ᏚᏂᏃᏗ ᎧᎴᏍᏗ ᏂᏓᏕᏘᏴᎯᏒᎢ, ᎠᏏ ᏔᎵᏁ ᎾᎵᏰᎢᎶᎯᎲᎾ ᎨᏎᏍᏗ ᏦᎢᏁ ᎢᎦ ᏥVᏎᎰ ᏑᎾᏙᏓᏆᏍᏗ ᎨᏒᎢ.

ᎠᎴ ᎾᏍᏉ ᎯᎠ ᎠᎾᎵᏍᏕᎵᏍᎩ ᏚᎾᏓᏡᏩᏗᏒ ᎠᏎ ᏏᏴᏫ ᎤᏂᏅᏏᏛ ᎤᎷᎯᏍᏗ ᎨᏎᏍᏗ ᎤᎳᎪᎭᏍᏗ ᏓᏂᎳᏫᎥ ᏄᎬᏫᏳᏒ ᎤᎾᏓᏡᎬᎢ.

ᎠᎾᎵᏍᏕᎵᏍᎩ ᏚᎾᏓᏡᏩᏗᏒ ᏂᏓᏕᏘᏴᎯᏒ ᎠᏎ ᎤᏂᏟᏐᏗ ᎨᏎᏍᏗ ᎠᏕᎸ ᎠᏏᏉ ᎾᎵᏰᎢᎶᎯᎲᎾ ᎨᏎᏍᏗ ᏚᎵᏍᏗ ᏔᎳᏍᎪᎯᏁ ᎢᎦ. ᏗᎪᏪᎵᏍᎩᏃ ᎾᎿ ᎤᎾᏓᏡᎬ ᎾᏍᎩ ᏭᏃᏁᏗ ᎨᏎᏍᏗ ᏗᎪᏪᎵᏍᎩ ᎤᏛᎾ ᏧᎾᏓᏡᎬ ᏄᏍᏛ ᏚᏙᎥ ᎾᏍᎩ ᎾᎿ ᎠᎾᎵᏍᏕᎵᏍᎩ ᎤᎾᏓᏡᎬᎢ, ᎠᎴ ᏕᎤᎾᏙᎥ ᏧᏂᎸᏫᏍᏓᏁᎯ, ᎠᎴ ᏂᎦᎥ ᎤᏂᏟᏌᏅ ᎠᏕᎸ ᏂᏓᏕᏘᏴᎯᏒ ᏚᏂᏃᏗ ᎧᎴᏍᏗ, ᎠᏏᏉ ᏔᎵᏁ ᎾᎵᏰᎢᎶᎯᎲᎾ ᎨᏎᏍᏗ ᏦᎢᏁ ᎢᎦ ᏥᏙᏎᎰ ᏑᎾᏙᏓᏆᏍᏗ ᎨᏒᎢ.

ᎠᏯᏙᎸᎢ 8. ᎯᎠ ᎦᎫᏍᏛᏗ ᎬᏩᏂᏁᏟᏴᏍᏗᏉ ᎨᏎᏍᏗ ᎯᎠ ᎾᏍᎩ ᎤᎾᏓᏡᎬ ᎤᎳᎪᎭᏍᏗ ᏓᏂᎳᏫᎥᎢ, ᎠᎴ ᎠᎲᏛᏉ ᎯᎸᎯᏢ ᏓᏂᎳᏫᎥᎢ.