Page:Charles Lamy - poèmes en patois Kimberlot.djvu/7

From Wikisource
Jump to navigation Jump to search
This page has been proofread.


84 ........................... VISIONS


Enn'mi d' fla-fla, d' cérémonies,
D'après s' ressource in sait s' mouver
Tâchaint d' faire d'z écolomies
Toudis si facile à r'trouver.


Aussi d'puis cheull' dernièrr' cahute
Jusqu'à ch' catiau de ch' graind seigneur,
Margré l' peinn' conte l' queulle in s' butte
N'avot qu' plaisir, joie et bonheur.


Et ch' démon jouqué su s' gargoulle,
A croir' qu'il étot intré d'dins,
Véyaint ch' tableau d' colère s' roule
Et s' démène in grignaint des dints.


Pis, sintaint qu'y n'a que l' débauche
Capape d' reinn' chés gins vicieux,
D' ses griff' y pressure s' caboche
Et busi' d' pus in pus furieux


A l'orgueul, l'invie et l' paresse,
Mais ch'est pour li d' trop tiots défauts
Quind, tout d'in cop, trouvaint l'ivresse,
Y s' drèch' criaint : « J' les tiens ! cheull' fos ! »


Awi, j' les tiens comm' dins eun' nasse
Ch' péqueux sait t'nir sin gros pisson,
N'a rien qui pass' sins qu' cha n' rapasse,
Faura bin qu'y mord't à ch' l'ham'çon !


Aveuc l'ivresse m' rutt' commère,
Dins peu d' timps d'ichi nos verrons
Chés hureux là rongés d' misère,
Adon, à deux, comm' nos rirons