This page has been proofread.
- VISIONS ............................ 83
- El l' coeur à plach', l'esprit trainquille,
- Homme autaint qu' fêmm', fill' comm' garchon,
- Buq' du martiau, pousse s'n awuille
- Tout in caintaint s' pus douch' cainchon.
- Pou n' point fair' droguer chés pratiques
- Païaint bien sins marchainder d' trop
- Chou qu'y n'a dins l' ville d' boutiques
- Ouv'tent leu volets au graind trot.
- Tout partout à chés étalaches
- Y n'a qu' du bon, solite et fort,
- L' cam'lott' n'a point cor fait d' ravaches,
- Personne n' cache à s' fair' du tort.
- Sins braire ou faire d' laid' grimace,
- Prop' comme ch' ciel par un biau jour,
- Chés tiots infaints pou s' reinne à l' classe
- L'long d' chés masons pass'tent à leu tour.
- L' plach' de ch' marché s'est rempli' d' monne,
- F'saint s' provision sins disputer,
- A ch' tribunal in n' vot personne
- D'autes qu' chés jug' à s'imbêter.
- Nur' part point in pauv' qui s' brondielle
- Teinne s' main disaint ses paters,
- Chacun s' suffit, miu dins s'n écuelle
- Sins raviser ch' vosin d'travers.
- Ch' mari parl' douch'mint à s'n épouse,
- Dins tous chés ménach' règn' la paix,
- Y n'a pont d' famill' qui s' jalouse,
- Pou ch' viux chés jônn' ont graind respect.
