This page has been proofread.
- VISIONS ............................ 97
- Ch'est qu'in soir, après eun' neuvaine,
- Quasi passé' sins désaoûler,
- A ch' cabaret in l'a vu reinne
- Et tout d'in in cop s'écrouler.
- Insuitt' s'ajouqer à quatt' pattes,
- Aboyer pir qu'in quien, courir,
- Se r'drècher, dev'nir écarlate,
- Râler comm' s'il allot morir,
- Après, les deux yiux hors de s' tiête,
- D'mourer tout d'bout r'wètiaint au lon,
- Et, s' figuraint vir eun' gross' biête,
- Se r'jéter f'saint eun' vi' d' démon,
- In criaint : « Au s'cours, Diu ! qu' cha brûle !
- Je l' sins tout près qu'a m' cope in deux !
- Par grâch' qu'in l' l'arrête ou qu'a r'cule,
- J'ai peur ! » Et, sainglotaint, hideux,
- S'tordaint, fair' queuq' pas in arrière,
- Muchaint s' figure aveuc ses mains,
- Et collé d'rière eun' cayère
- Rester accroupi queuq' monmints.
- Pis, d' ses dix dogts griffaint s' poitrine
- Qu'in hoquet gonflot in l' soul'vaint
- Comm' si s'n in d'dains n'étot qu'eun' mine
- Rongé' déchiq'té' pa ch' brin-d'-vin,
- S' sintaint étouffé par eun' crainque,
- D'in bond s' lever et su ch' pavé
- Quéir à l' rinvers' comme eun' plainque
- Sins pus bouger qu'in quien quervé.
- 7
