This page has been proofread.
96 ........................... VISIONS
- De l' bou' plein s' rouière et s' perruque
- N' sachaint d'us qu'il est ni c' qu'y dit,
- Aveuc dégoût ch' passaint l' eurluque
- Et s' sauv' comme à l' vu' d'in bandit.
- A partir de ch' monmint s' maîtresse,
- L'eau d' vie, in f'ra chou qu'all' vorra,
- Rien n' porra l' eur'tirer d' l'ivresse
- D'u qu' margré tout all' l'intrinn'ra ;
- Ni l' prièr' de s' fêmme et d' ses mioches,
- Ni cheull' malédiction d' ses viux,
- Ni l' peur de l' justice ou des r'proches,
- Rien n'est capap' d'ouvrir ses yiux !
- Pus il avainche et pus ch'est pire !
- Y bot et n'a qu' cha qui l' norrit,
- Y grinche, y brait quind y veut rire
- Et pu' comm' l'halein' de ch' pourri.
- Même in saing frais, d'eun' voix d' rogomme,
- Y beurdoulle et n' sait pus pinser,
- In vot déjà qu'y n' ress' de ch' l'homme
- Qu'in corps n'ayaint qu' l'âme à passer.
- Awi ! cheull' parfaitt' créature
- Qu'à s'n imache a créé l' bon Diu
- Volaint qu'y seuch' roi d' la nature
- N'est qu'in mont d' chair, usé, poussiù,
- Qu'eun' goutte à ch' t heur' met in furie,
- Qu'in verr' fait quéir du haut mal,
- Qu'in litr' mèn'rot drot à l'tuerie,
- S'y n'étot point à l'hôpital !
