Page:Charles Lamy - poèmes en patois Kimberlot.djvu/17

From Wikisource
Jump to navigation Jump to search
This page has been proofread.


94 ........................... VISIONS


Et ch' cabaret avot vu s' vinte
In un rien d' timps doubler, tripler,
Ch' diape d' bon saing s' faisot eun' pinte
D'in r'wétier bocop s'y saoûler.


Comme ch'ti là, seul, dins cheull' ville
Ramassot des moncheaux d'écus,
Y se n' n'est monté dix, chint, mille,
Chaq' jour à ch't heure in compte in d' pus.


Aussi ch' l'argint gaigné à l' pelle
Qu'in avot soin d' mette d' côté
A ch' cabaret comm' dins eun' telle
Pou leur déroule in quaintité.


Ch' riche in jouaint sur in cop d' carte
L'fortunn' des siens et leu bonheur,
Y cueurt oblier qu'y s'écarte
Du qu'min de l' droture et de l'honneur.


Ch' boutiquier qu' surquent l' triss' faillite,
Chés huissiers et souvint l' prison,
Y resse à d'meure hureux d'êtt' quitte
D' l'innui qu'il éprouve à s' mason.


Ch' l'ouvrier laichaint s' femme in peine
Du sam'di soir au lundi soir,
Quind y n'y va point tout l' semaine,
N'in sort qu'in bour'laint su ch' trottoir.


Aussi quind y r'vient à s' cahute
S' semainn' claquée à godailler,
Pindaint qu'aveu s'fêmme y s' dispute,
Au liu d' mier ses tiots n' font qu' brailler.