This page has been proofread.
- VISIONS ............................ 93
- Ah ! ch'est que ch' cabaret qu' dins s' rage
- Ch' démon avot rimpli d' brin-d-'vin
- Et fait ouvrir jusse au passage
- D' chés habitaints de l' vill' d'avaint ;
- Ch'est que ch' fléiau pire qu' la guerre
- Bon à conduir' ch' l'homme à ch' l'égout
- Et qu'in d'vrot abolir sur tierre,
- Ch' cabaret étot l' cause d' tout !
- Pourtaint bin qu'in attirot ch' monne
- Pou faire avaler d' cheull' boisson
- Du cominch'mint ni viux, ni jônne
- N' volot't point chuquer à ch' l'ham'çon.
- Cha n'étot point dins l'habitute
- D'aller à ch' cabaret s'assir,
- Chacun rintrot vite à s' cahute
- Après s'n ouvrache aveuc plaisir.
- Mais aveuc du timps, de l' patieinche
- In vient à bout d' fair' chou qu'in veut,
- Car voloir n'a t'y pus grainn' scieinche
- Et mêm' pou ch' mal, qui veut y peut !
- Aussi quind dins l' ville agraindie
- Y s'y gaignot des doup' par tas,
- In druquin comme eun' maladie
- Qui sins s'moutrer vous flainque à bas,
- Ch' brin-d'-vin trouvé pus agréape
- Après queuq' verr' pa ch' l'ouvrier
- A chaque r'pas s' véyot su s' tape,
- Pour in boir' n' fallot pus l' prier.
