This page has been proofread.
88 ........................... VISIONS
- D' quaintités d' magasins par rue
- Vindaint d' tout quasimint pou rien,
- D'us qu'à l' jorné' ch' monne y se r'mue
- Croïaint qu'y n'a qu' là tout est bien ;
- Des grainds bazars qui font leu p'lotte
- Pleins d' joujoux, d' vêt'mints d' confection,
- D' bidons, d' bib'lots, sapré' cam'lotte
- Bien étalé' pou l' tintation
- A l'intrée et dins d' bell' vitrines
- Ed'u qu' tout s' pai' d'vaint d' l'importer,
- Ruine d' chés tiott' boutiq' vosines
- Qui pa ch' crédit n' peut't pont lutter.
- Et l' pire d' tout, cadeau de ch' diape,
- Des brass'ri', cafés, cabarets
- Tertouss' d'aspect l' pus agréape
- Pou rat'nir chés buveux intrés.
- Dins l' ville avaint mal éclairée
- Tell'mint qu'in n'osot point sortir,
- N'ayaint qu'eun' routt' tout effondrée
- Pour y v'nir ou pou n'in r'partir,
- Y n'a pou leur, tous les dix mètes
- Des becs ed' gaz l' long d' chés trottoirs,
- Boutiq', magasins, masons d' maîtes
- Ne s' leum' pus autt'mint tous les soirs.
- Partout chés traimways électriques
- Ou chés cars trinés pa l' vapeur
- Que ch' bon marché rind fin pratiques
- Dins chés ru' s'in vont à fair' peur.
