This page has been proofread.
- VISIONS ............................ 89
- Bien au plein mitain d'eun' grainn' gare
- Ouvertt' la nuit autaint que l'jour,
- A chaq' minutt' in train démare
- Pindaint qu' d'autt' arriv't à leu tour ;
- Ch'ti-chi par chint wagons à l' file
- Importt' chés produits fabriqués
- Pa l' tapé' d'usines d' la ville,
- Ch'ti-là décarque d'ssus chés quais
- Voyageux, acateux, tourisses
- Et marchaindises d' tous pâys.
- Aussi par chés ru' d'vaint si trisses
- Véyaint rar'mint des gins bien mis,
- Ou sauf pour ouvrer dins l' comune,
- S' reinne au marché quind y f'sot clair,
- Personn' ne s' prom'not sitôt l' brune
- A moins que l' dimainch' pou preinn' l'air;
- A ch't heure, a continué, la foule
- Par chés traimways ou ch' quemin d' fer
- Arriv', s'in va, s'arrêtt', s'écoule
- Mèm' quind y f'rot l' pus fort hiver.
- Et su l'timps qu'all' passe ou rapasse
- L' long d' chés magasins à s' prom'ner
- Ou qu' dins chés cafés all' s'intasse
- Boir' sins soif, juer ou flâner.
- Su l' chaussée in vot mill' votures
- Carette à bras, camions, haquets,
- Carqués d'tonniaux et d' fornitures
- In caiss', in ballots, in paquets.
