N' cachez pos pus longtemps, et cha m'étéonne que vous n’ l'intindez pos, vu qu‘ ch'est pour vous qui bat.
Quoi c’ qui vous prind de fieu.
Gabrielle, j' vous adore et j' vous aime comme ein séot;... je n'sés pos c’ que j’ f'réos si vous m'orpoussez.
Ah chà, més vous n'y pinsez pos; (l' faisant s'el'ver) elvez-vous;... ch'est presque éine déclaratiéon qu’ vous faites-là.
N'in doutez pos, et ch'est tout c’ qu’i' a d’ pus sérieux, j’hésitéos d' vous in faire l'aveux, més aujord'hui qu' j'ai pu juger de l’ manière que vo’ n’ héomme apprécis vos qualités, j' vous l’ dis sans scrupule; si vo’ n' héomme vous désapproufe dins vos professiéons, mi, au contraire, j' suis plein d’admiratiéon pour vous.
M'n héomme n'a james eu l'esprit assez ouvert pour li comprinte l' nécessité d' l'émancipatiéon des feimmes;... més ch’ n'est pos eine réséon pour que j'acoute vos sottises.
N' dites pos qu’ ch'est sott'mint que j' vous aime; ténez, je n’ vous d'mante qu'eine cosse, laissez-m’ vous prouver l' sincérité de m'n affectiéon pour vous et quand vous n' doutrez pus de m'n amour, vous s'rez acore libre d’ faire à vo’ mote.
Je n' peux pos vous définte d'ète aimable avec mi;... même comme ami j' vous permets certaine familiarité; seul’mint je n' m'ingache à rien.
Je n’ vous in d'mante pos davantache ;... Si vous avez confiance in mi j'mets m'savoir faire à vot’ dispositiéon et j' s’réos heureux d' pratiquer avec vous.
Cha dépind commint-c' que vous l'intindez.
