BUNIOL
Vraimint vous aviez déjà pinsé...
À vous guérir, aoui (elle écrit).
Ch'est eine intintiéon qui vous vaudra pus que m'n estime, si vous parvénez à m' guérir de mes tourniols je n' vous oublirai pos su’ l' pétit couan de m’ testamint.
Vous irez chez ein pharmacien, i' vous f'ra eine boutelle que vous preindrez par verre à vin, avant vos r'pas;... cobin c' que vous faites d'orpas par jour ?
J' n'in f'séos pus qu’ deux, més d'puis que j’ pinse à m’ marier, j'ai r'pris l'habitude de minger du matin, pour orfaire mes forches l' pus possible, si bin qu'asteur j' fés trois r'pas.
Déonc, vous preindrez régulièr'mint, ein verre au matin, ein à midi et ein au soir, avec chà du matin in vous el'vant vous preindrez eine douche et vous vous frott’rez à l'iéeau sédatif, j' veux que m' future tante n'ai pos à r'gretter s’ mariache.
Cha fét qu’ vous espérez n'orféonte.
J' frai tout m’ possible.
À la bonne heure; je n’ vous d'mante pos l’ prix de l’ visite, j' pai’rai largemint aprés m' guériséon.
Vous n’annoncez pos l’ nouvelle à Fernand, i' est au saléon.
Bé tout d' même, autant batte l' fier tant qu’i est quéaud;... i’ n' va pét-ète pos l’printe du si bon côté qu’ vous.
Bah! vot’ n'veux i' est assez philosophe pou' n' pos tréop s'in étonner; ch'est à vous à li annoncer chà tout douch'mint.
