—Ikaduha mo nga apoy hi don Pedro Eibarramendia? —binmalik pagpakiana hi Elias, iginduduas ngan inmiba an kahimo.
—Oo, binmaton hi Ibarra, nalilibang; — hinalipot namon an apelyido kay halaba.
—Baskongado adto? liniwat ni Elias an pakiana, hinmarani.
—Oo, kundi, inaano ka? nagpakiana, nahapapausa. Hi Elias nangumol han iya kamaoo ngan idinuon ha iya baba ngan magkinita kan Crisostomo nga inmisol han pakakita han iya pamayhon nga lain.
—Maaram ka kun hino hi D. Pedro Eibarramendia? —nagpakiana nagliligot. —Hi D. Pedro Eibarramendia amo adton tampalasan nga nagbutangbutang han akon apoy ngan naghatag hin karat'an han bug-os ko nga katulinan... Ginbibiniling ko ini nga apelyido ngan iini ihinatag ha akon sa Dios... yana pagbaydi an amon ngatanan mga kasugad!
Hi Crisostomo tinmago han iya nawong dida han iya mga kamot, kundi kinaptan hiya ni Elias ha butkon ngan uy-ugon ngan sidngon hin mapait nga mga pulong nga puno hin kasina:
—Pagkit'a hin maupay, kitaa ako kun waray ba ako pag-antos, ngan ikaw buhi ka, nahagugugma ka, may ada mo salapi, may pagkakalugaringon, kadungganan, buhi ka... buhi!
Ngan waray na panginano, dinmalagan ngadto hin natitirok nga mga salsalon, kundi han pakakapot hin duha nga daga buhian liwat dayon ngan, sugad hin buang magkinita kan Ibarra nga waray pagkikiwa. kat.
—Ano ba an binubuhat ko? —nagyakan ngan lumakat
Didto ha komedor naninihapon hira Kapitan Tiyago, hi Linares ngan hi Dada Isabel; ngadto ha ruwang naabot an hinarantiyaw han mga pinggan ngan mga kubyertos. Hi Maria Clara nagsiring nga diri hiya kinakaunkaon, salit linmingkod la ha tungod han piyano, inupdan han matawa nga Sinang nga naghihinuring ha iya hin mga tiriguhon nga
