mga pulong, hamtang nagsisinuduysudoy hi P. Salvi, waray himumutang, patapustapos han ruwang.
Diri kay an malaymay diri ginugutom, diri; kundi kay may ginpapaabot nga uusa katawo ngan karuyag niya pagpahinmulusan nga an mangarasawa ha iya diri makatambong: amo adto an ipanirihapon nga uras ni Linares. —Kaduwas ito nga dudyong diri lumusad ngada han pag-ikawalo, hinmuring hi Sinang gintitinudlok an pa amo ito nga uras an iya iaabot. Ini nangungulitawo man sugad kan Linares.
Hi Maria Clara sinmiplat han iya sangkay may dara nga kakulba. Hi Sinang, waray la panginano, nagpadayon han iya magpakababaraka nga mga sumat:
—Ay! maaram na ako kun ano nga diri nalusad bisan ko ginpipinaabat hin pulong; diri buot gumamit hin suga didto ha kombento! Maaram ka? Tikang ka masakit, an duha nga suga nga iya paruktanan waray na pamarukti... Kundi, kitaa na gud! kamakangingirhat hiton mga mata ngan hiton nawong!(¹)
Hadto ngahaw an urasan ha sakob han balay tiniuktok hin walo. An padi kinulba ngan napasingadto ha usa nga piliw paglingkod.
—Aadi na! —nabati ka? —ngani Sinang, kinutol hi Maria Clara; An lingganay ha singbahan tinmuktok man hin animas ngan ngatanan nagkabuhat pangadi; hi P. Salvi namatbat hin nakurog ngan mahinay nga tingog, kundi waray ha iya sinmabat kay an tagsatagsa naghinpangadi la. An tuman nga natatapos an pangadi sumaka hi Ibarra. An batan'on diri la kay luto ha panapton kundi pati ha bayhon, salit hi Maria Clara, han pakakita ha iya, dinmaop pagpakiana na unta kun inaano, kundi hadto ngahaw nga dalikyat binati in butubuto hin pusil. Hi Ibarra nahapaukoy, nanlidong an mga mata ngan nawad'an hin pulong. An padi tinmago ha luyo hin usa nga harigi. Binmaton man in binutubuto tikang ha may kombento ngan sinundan hin gugliat ngan hin dadlagan. Hira Kapitan Tiyago, Dada Isabel ngan Linares nagkasulod hin dadlagan, naggiginugliat: "tulisan! tulisan !" Hi Andeng nahasusunod ha ira nakakadara hin araslan ngan ngadto tadong han iya bugto ha gatas.
Hi Dada Isabel nahapaluhod ngan magtinuok nangadi
