Hi Ibarra namumudlat ngan an duha nga kamot ikinakapot ha ulo baga sugad hin waray ha iya pamamati.
--Diri na mapupugong' - nagpadayon hi Elias; hi na ako nga haabot, diri ko kinikilala iton mga puno... likay, senyor, tungod la han imo tuna, likay!
--Ngain ako kakadto? Yana nga gab-i may naghuhu- lat ha akon nagsiring hi Ibarra nahanumdom kan Maria Clara.
--Bisan la ngain nga bungto, ngadto ha Manila, ha balay hin usa nga punuan kundi ha lain nga daplin, basi diri pakasidngon nga ikaw an nag-una hini!
--Kun ako la ngahaw in magsumbong?
--Ikaw, hin pagsumbong? --nagpakiana hi Elias nga pakakasidngon ka nga inmisol ngan magkinita ha iya; malingo ngan matalaw hinin naggugubot ngan sisidngon ka han iba nga maluya; makakasiring hira nga imo la hira igintukso basi ka matagan hin dungog, makakasiring. . . .
--Kundi, ano man in bubuhaton?
--Ginsiring ko na ikaw: sunuga an ngatanan mo nga papel nga mahananabi ha imo, palagiw ngan paghulat han mga hinabo...
--Hi Maria Clara? - nakagpulong an batan'on; - ayaw, mamatay la ako!
Hi Elias naglubag an iya mga kamot ngan sumiring:
--Ta, oo, bisan na la magtagam ka han mga hananabo, pag-andam ngadaan kun igsumbong ka na!
--Ta, buligi ako; dida hiton iito nga karpeta aada an mga surat han akon mga kag-anak; pilia la an kan itay kay amo ada an makakaraot ha akon; basaha la an mga pirma.
Ngan an batan'on, lisang, nagugupong, naukab ngan nataklob hin mga kahon, nanirok hin mga papel, nabasa hin dagmit hin mga surat, nan-gugusi, nanhihipos han iba, nakuha hin mga basahan, ginpapalipali ngan iba pa. Hi Elias amo gihapon, bisan la kun diri sugad kalisang kundi amo man nga pangahas; waray kaiha umukoy, naburarat an mga mata nagbarubalikad hin usa nga papel nga nakada ha iya kamot ngan magpakiana hin nakurog nga tingog:
--Nakakilala an imo mga kag-anak kan D. Pedro Eibarramendia?
--Kaiya! binmaton hi Ibarra ngan inmukab hin usa nga kahon ngan kinmuha didto hin usa katambak nga papel, apoy han akon amay.
