ra, napasingadto paghilangkag ha iya laboratoryo.
Aw! ikaw ngayan, Elias? nagsiring; nagpipinanumdom ako ha imo; kakulop nahangalimot ako pagpakiana ha imo han ngaran hadto nga katsila nga gin-ukyan anay han imo apoy.
-Diri ako yana in akon tuyo, senyor...
-Kitaa daw, nagpadayon hi Ibarra, waray pa sasabot han kaikag han usa, ngan idinuok ha laga in usa nga sipak; nakaagi ako hin usa nga dako nga himurulsan: ini nga kawayan diri ginduduktan hin kalayo...
-Waray sapayan yana hiton kawayan senyor; an kasuruk'an yana nga tirukon mo an imo mga papel ngan kumalagiw ka ha sakob hin usa kaminuto.
Hi Ibarra kinalasan, sinmiplat kan Elias, kundi han pakakita han bayhon hini nga waray pagpapanawatawa, hinbuhian an sipak nga nakada ha iya kamot.
-Sunuga ngatanan an makakaraot ha imo ngan ha sulod hin usa kauras kinahanglan nga aadto ka na ha hirayo.
-Kay ano? nagpakiana.
-Tagua hin maupay an ngatanan mo nga inawilan...
-Kay ano?
-Sunuga an ngatanan nga papel nga sinurat mo, o ginsurat man ha imo; an labi kawaray hinnanabihan nga ano man makakaamong ha imo...
-Kay ano?
-Kay nakainaw ako, ito pa la yana hin usa nga sarabot pagsulod han bungto ngan ginhihimo nga imo, basi ka say maghikaraot.
-Sarabot pagsulod han bungto? Ngan hino man in nangungulo?
-Waray ko na hibarui; adto pa gud la ako igkakahi-mangraw hin usa hito nga mga waray palad nga ginbaydan nga umapi la, ngan waray ko gud kahimo hin kasagduni.
-Ngan ito, waray ha imo pagsumat kun hino an nagbayad?
-Oo, nangaro ha akon nga diri ko igsumat bisan kanay, nagsiring nga ikaw kuno.
- Ginoo ko!-nakasiring hi Ibarra ngan nahadlok.
-Senyor, ayaw na pagruhaduha, ayaw pagkarag hin panahon kay bangin yana ngahaw nga gab-i hanabo an kagubot.
