makaruruyag, an harupoy mahalayahay, an mga bituon ha sidlangan namamag-arupaop ngan an mga manok nagduduro hin panugaok. Duro na adto nga pag-ungara; masarusaydn han Virgen an pagpadara hin duha kagatos kalim’an kapisos! Ano in kuri ha iya, han Iroy sa Dios, hin paghatag hito ha iya? Kundi dida ha ilarom han ladawan say la niya hin-abatan an surat ni iya tatay nga naaro hin lilima kagatos kapisos nga lukat ha iya... Waray iba nga mabubuhat kundi an paglakat. Han pag-abat nga hi iya apoy waray pagkikiwa, pinakasiring nga nakaturog naglaso hin luya nga pamahawon. Urusahon! Waray la hiya kukulbaa, tinatawatawa pa ngani lugod. Ano daw la nga hadto nga gab-i nagmabiduon man hiya nga uraura? Diri man hiya mapakadto ha hirayo, makakalaoy hiya ha ira balay kinaduha kaadlaw; hi iya apoy makakahimo hin pakigkita ha iya, ngan an mahatungod kan Basilio, maiha na ini nga maaram han maraot nga lakat han kalipungan ni iya itay kay masukot magyakan ha iya hin pagkasiring:
—Magmediko ngani ako ngan magkaasawa kita, waray na kinahanglan ni imo tatay hiton iya mga tuna.
—Kalurong ko nga nagtinangis ako hin sugad hadto,—nakasiring hiya hamtang naghihingayad han iya takba.
Ngan tungod kay an iya mga tudlo nakasaping han relikaryo, iya ini idinuok ha iya mga im-im, hinadkan, kundi pinahid niya dayon kay nahadlok han tapon; adto nga relikaryo nga may mga brilyante ngan esmeralda tikang adto ha mga kamot hin usa nga sanlahon... Ah! amo daw ngahaw, kun tapunan hiya hadto nga sakit, diri hiya makakaasawa.
Ngan tungod kay nagtitikang na pagpawa ngan nakakita kan iya apoy nga nalingkod didto hin usa nga piliw, nag-iinarualagad an paniplat han iya ngatanan mga kiwa, pinurot niya an iya takba nga puno hin panapton, dinmaop hin mahiyumhiyom ngan humarok han kamot. Binindisyunan hiya han tigurang hin wa ray yakanyakan. Hi Juli naruyag pag-intrimis.
—Umuli ngani hi itay sidnga nga tinmuod ako pagsulod ha kolehiyo: iton akon agaron maaram magkinatsila. Diri na igkikita hin sugad kabarato nga kolehiyo.
