didto ha Escolta’ ngan makikialayon ako ha imo pagbulig ha maupay nga kaburut’on.
Hi Basilio nagpasalamat hin laktod ngan lumakat. —Nagsayop ada ako han akon pitad?—Nagmugo hi Simoun han nag-uusaan na la.—Nagruruhaduha ada ha akon o nag-iisip hin hilom nga paagi han iya panimulos, nga nahadlok nga hibaruan ha butnga han kamingawan han gab-i? Tingali an mga tuig nga ikinauripon nakaparong didto ha iya kasingkasing han ngatanan nga pagbati ha igkasitawo ngan say na la nahabilin an mga hilig nga kanan mananap nga amo an pangahas nga mabuhi ngan mag-anak? Kun amo ini, an hurmaan hiwi, salit angay liwaton pagtunaw... Salit kasuruk’an an paghirumpag;
Ngan sinumpayan hin mga pulong nga magpakaharadlok, baga sugad hin may iya inaatubang nga tawo.
—Pag-ilob anay, kamo nga nagbilin ha akon hin ngaran ngan hin urukyan, pag-ilob anay! Ngatanan nagsusunudsunod la inin kawaray ko tuna nga natawhan, kabubwason ngan kamurayawan, an iyo ngahaw mga linubngan... kundi, pag-ilob kamo anay! Ngan ikaw, kalag nga birilhon, gidadakui nga hiyas, kasingkasing nga maambong, nga nabuhi ha paghupot hin usa la nga panhunahuna ngan nag-ula ka han imo kinabuhi hin waray pag-isip han kabaralsan ngan pagdayaw hin bisan la kanay, pag-ilob la anay, pag-ilob1 An mga katigayunan nga akon ginagamit bangin diri mo ayon, kundi amo an haruhaglipot... Nagtitiharani, ngan sumirang na ngani, ako ngahaw in makathon hin pagsumat ha iyo. Pag-ilob anay kamo!
Han pagpukrat ni Juli han iya magbiduon nga mga mata nakakita nga an balay nagsisisirom pa. Nanunugaok an mga manok. An siyahan nga pinmaabot ha iya hunahuna amo nga tingali an Virgen nagmilagro ngan an adlaw diri masirang bisan pag-ungaraon han kamanukan.
Binmuhat, nangudos, nangadi hin tukib nga pangaraba han iya mga pangadion ha aga ngan, hmayhinay nga diri magkaradol, ginmawas ngadto ha pantaw. Waray milagro; an adlaw masirang, an aga magma-
