ha ira, ngan igpapasalamat ha imo in usa nga kinabuhi hin mga pagtamay ug mga pag-antos! May pahalipay ko ha imo, batan’on! Kun hutang na in usa nga lawas kawang la ang pagsinangpita. Karuhaan katuig nga unob nga kauripon, tigsad nga pagtamay ngan kanunay nga paghirugmok, nakakadarahig hin pagkabuktot han panhunahuna nga diri nahababahk katadong hin usa la kaadlaw nga panalinguha. An mga pagbati nga maupay o maraot pinanununod ngan nahabibilin han kag-anak ha mga anak. Kun sugad, mabuhi an magpakaruruyag nga panhunahuna, mabuhi an mga inop han uripon nga naaro la hin magutiay nga dugnit nga igpuputos han talikara basi diri magmaaringasa nga uraura ngan diri makapilas han panit! Ikaw naghihingyap hin gutiay nga urukyan nga may gutiay nga kahimyangan; usa nga asawa ngan hin usa kapurot nga bugas; amo ini an tawo nga susgaranan ha Pilipinas! Maupay kun tagan ka, kapalaran mo.
Hi Basilio, nga hiara pagsugot ngan pag-ilob han mga tulos ngan kaaringit ni Kapitan Tiyago, ngan napupukos ni Simoun nga ha iya pagkita makaharadlok ngan kahihirutan, nga nalandaw dida hin usa nga sag-od nga tinina hin luha ug dugo, nagpipinamaribad nga waray niya ipinakakatakos pag-irog ha politika, nga waray niya bisan la ano nga panhunahuna kay waray niya pag-admi adto nga himangrawon, kundi hiya andam gihapon hin panambulig ha adlaw nga hiya ungaraon, nga yana nga mga panahon uusa la an iya kinikita nga kasuruk’an nga amo an pagtutdo han bungto hin hibaro ug iba pa. Pinugngan ni Simoun ha usa nga kiwa nga magpadayon, ngan tungod kay nag-iipagparawa na, nagsiring:
—Batan’on, diri ako naungara nga hilumon mo an akon tinipig kay maaram ako nga an kabuutan usa han imo mag-upay nga mga gawi, ngan bisan pa maruyag ka ha akon hin paglingo, hi Alahero Simoun, an sangkay han mga punuan ngan han mga prayle say gagapilan hin pagtuod, diri hi Basilio an magturuon nga gintatahapan na nga pilibustero tungod la kay taga dinhi, nagpapakatakos nga lumandaw ngan kilalahon, ngan tungod kay an pag-aradman nga imo tinuturon igkikita hin gainhanan nga mga kasibang. Kundi, bisan pa waray ka umuyon han akon mga panalinguha, mga sano kun magbalhin ka hin panhunahuna kadtua ako ha akon baldy
