—Asya! Salit maupay ha latin,—nagmugo an dominiko, dapit nahapapahiyom. Tungod han iya kinaiya, kay say man nahihiligan, say niya pinili nga pagtutun’ an an Medicina; hi Kapitan Tiyago karuyag an DERECHO basi mamay-ada niya abogado nga diri na babaydan; kundi, diri an pagkilala ngan paghibaro hin tukod han mga balaod igo na basi mamay-ada mga clientes dinhi ha Pilipinas; kinahanglan nga magdaog han mga kalipungan, ngan basi ini matuman kinahanglan in kasangkayan, gahom ha sakob han mga katirig-uban, ngan hin dila nga maupay magyakan. Hi Kapitan Tiyago, ha katapusan, tinmugot kay nahanumdom nga an mga magturuon hin medisina nag-uuliskay hin mga minatay, maiha na nga panahon nga nagbibiniling hiya hin hilo nga ig-iipo hin mga bulang, ngan an labi kamaupay nga iya hinbabaruan amo an dugo hin insik nga namatay ha sifilis.
Sugad liin kamaupay han inmagi na nga lakat han iya pagtuon, labaw pa ngani, kun baga sidngon, natapos han batan’on an Medicina nga pag-aradman, ngan bisan dida pa ha tercer ano nagtikang dayon hin palaran nga pamulong, ngan ini diri la kay nagiginkaandaman hin mahusay nga kabubwason, kundi nakakabulig liwat hin pakaagi hin ipinapalit hin mag-upay nga panapton ngan nakakahipos pa.
Yana nga tuig amo na an katapusan han iya carrera ngan ha sakob hin duha kabulan magiginmediko hiya, mauli ngadto ha iya bungto ngan mapakasal kan Juli basi umukoy hin kabutang nga malipayon. Ngan makarawat han titulo pagka-Doctor en Medicina, diri la kay waray ruhaduha, kundi kay ginpapamulat niya nga magiginmaranggat nga corona han iya pag-aram. Hiya an gintungdan nga say mamumulong han pagpasalamat hadto nga investidura, ngan daan na ginkikita an hinabo, nga natindog hiya didto ha butnga han Paraninfo ha atubangan han bug-os nga claustro ngan say la hiya ginkikita ngan ginbabantayan han kadam’an. Ngata nan adto nga mga ulo, an kahigtaasan ha kinaadman ha Manila, nga daw nagkakapuputos han ira mga kapa nga magkalamlain an tina, ngatanan an kababayin’an nga nagpapakadto pagkita nga ha una nga mga panahon naniniplat ha iya diri la hin pakatamay, kundi hin kadiri gud pag-asa, ngatanan adto nga kaginuuhan nga may mga kotse nga, han bata pa hiya, haros ha iya
