pagsaysay han leksiyon an mga estudyante nga iya ayon: matuod man gud liwat, nag-iilob la hin bisan ano nga baton. Hi Basilio dida hini nga panahon nasulot na hin mag-upay nga sapatos ngan hin bado nga bag-o nga pinalansa hin maupay. Han pag-abat han iya propesor nga diri natawa han iya mga intrimis ngan han pagkita nga an iya mga mata dagko ngan magruyo, daw sugad hin may unob nga pakiana, pinakasiring hiya nga lurong, ngan usa kaadlaw tinuyo nga pagkatatawaan, ginsukna han leksiyon. Sinubay ni Basilio patapustapos, waray sangko bisan usa nga p; ginngaranan hiya hin papagayo han propesor ngan nagsusumaton hin usa nga kaagi nga ginkatatawaan han bug-os nga klase, ngan basi dumugang an katatawa ngan pagmatuuran an ngaran nga iginbunyag, ginsukna pa hin pira nga pakiana, nagkiniro anay ha iya mga ayon abi ta pa: “May kata tawa ta hini yana.”
Hi Basilio hadto maaram na magkinatsila ngan nahabaro pagbaton hin tinuyo basi waray mahakatawa. Waray may inmayon ngan an badyangas nga ginpapamulat waray umabot, waray may nahakatawa ngan an prayle naurit kay nabayasaw an iya mga paglaom ngan waray na pakigkaupay ha iya nga dapit nanginbuwa han iya mga tagna. Kundi, hino in makakasiring nga may magawas nga kataliungdan dida hin usa nga ulo nga waray kasusudlay, nga kanan indiyo, nga dumog an sapatos, nga diri pa la maiha iniihap dida han mga tamsi nga magsaba? Ngan salit kun didto han iba nga mga buruan hin hibaro may totoo nga talinguha han kabataan hin pag-aram, kun ini hinsasabutan han mga propesores ira ikinalilipay, sugad man didto hin usa nga kolehiyo nga ginpapalakat hin mga tawo nga nakakasiring, an kadam’an ha ira, nga an hibaro usa nga karat’an para hin pipira la nga magturuon, nahinabo kan Basilio nga namay-maraot nga dara kay tikang hadto waray na hiya pakianhi tubtob ngada han katapos han tuig. Ano in kinahanglan hin diri man nakakapatawa?
Bisan nawawarayan na gugma hin bisan ano ngan budt na bumaya han pag-aram, nakalahos hiya gihapon ngadto ha cuarto año de latin. Ano pa in pagtinuon, ano nga diri na la magkinaturog sugad han iba, ngan tumapod na la han lakat han palad? Usa han duduha niya nga mga propesor, sangyaw kaupay ngan minahal han ngatanan: sirrisiring nga ma-
