naabot na an Pasko ngan gindadara hiya ni Kapitan Tiyago ngadto ha San Diego. Kundi natatanog niya hin maupay an leksiyon, upod pati kudlit, bisan kun diri dako an iya hadto didto hinsasabutan. Ha katapusan nailob niya ini ngatanan han pag-abat nga dida han tutulo kun uupat ba kagatos nga api han iya klase may ada la kakap’atan nga ginpapasidunggan pagsukna han propesor tungod kay linmutaw dara han postura, o pinilyo nga buhat, o ha paghiayuni han gawi o iba pa nga hinungdan. Ha luyo nga bahin, damo an nakakalipay han sugad hadto nga kahimtang kay diri na nagkakabudlay hin pagpinanhunahuna ngan hin pagsantop.
—An tuyo han pagsulod ha kolehiyo diri pag-aram ngan paghibaro, kundi an pakapasar, ngan kun nahihimo hin paghibarui an basahan dida ha pagmemoiya, ano pa in iba nga uungaraon? Pasar ka na ha sunod nga año.
Hi Basilio nakalahos han eksamen kay nakabaton, baga in makina, waray pag-urung-urong, waray giruginhawa, han usa la nga pakiana nga binuhat ha iya, ngan nakakuha hin nota nga aprobado ha dako nga harahara han mga eksaminador. An iya siyam nga kaurupdan— kay an pag-iksamen tinagpulo basi ha kadagmitan—wa ray dangpi hin sugad nga kapalaran salit namagbalik hin usa pa katuig nga pagkalurong.
Ha segundo año, tungod kay nagdaog hin damo nga salapi an manok nga iya minangnuan, tinagan hiya ni Kapitan Tiyago hin maupay nga suhol ngan iya dayon ipinalit hin sapatos ngan hin kalo nga fieltro Ini ngan han mga panapton nga ihinahatag ha iya han iya agaron, nga iya ginhihingayad basi mahasukol ha iya, an iya hitsura nagtikatuhay, kundi dida na la tubtob. Dida hin usa nga klase nga damo in api, dako in kinahanglanon basi la in usa lumutaw, ngan an magturuon nga tikang ha tinikangan diii makagpakilala han iya kaaram, o diri igkasangkay han mga propesor, magkukuri nga. hikilal’an ngada han katapos pagtudn. Kundi nagpadayon la hiya gihapon kay an pagkaunob asya an iya masarig nga kinaiya. An iya kahimtangan baga nag-upay-upay han pagabot na niya ha tercer año. Nahatungod ha iya hin kapropesor in usa nga dominiko nga makisasangkayon, dudyaganon hin intrimis ngan hin pagpatatawa han mga magturuon, hubya kay masukot say niya pinapa-
