This page has been proofread.
32
mǎ-tuo̿i, 12.
- Ge̿ng-ga̿i gṳ̀ ēng niōng nà gṳ̀ gâ̤ miâng iông chṳ̆ ko̤̿.
- Iŏ̤ng ciū-sī niōng gi̿ng-hāu síng-dí Ì-so̿-ngā tê-chîng uā-gua̿ gâ̤ dī,
- Gō̤-uā, Chū uòi gâ̤ nû-gě, sī uòi tĭ chṳ̆ lâ̤ gâ̤; cèng dă̤ uòi o̿ gâ̤, uòi séng-dǐ cèng de̤̿ng-i̿ gâ̤, uòi ŏ̤ nà uòi gâ̤ Sěng hū da̿u gṳ̀ séng-di̿, gṳ̀ ŏ̤ nà uòi diāng-gṳ́ gâ̤ dī háu biē-gŏ-nêng dă̤-dí.
- Gṳ̀ mài iáu nêng cáing, mài iáu nêng nāu; da̿u gái-diō̤-di̿ iǎ mǎu nêng tia̿ng-nī-gi̿ng gṳ̀ gâ̤ siáng-éng.
- Tǎu ciè-tiāu gâ̤ mô̤ng-sáng gṳ̀ mài ǎu-dō̤ng, tǎu ú-tiāu gâ̤ dáing-hǒ gṳ̀ iǎ mài lōng ú-tiāu, dǎing gṳ̀ nà iŏ̤ng diāng-gṳ́ gâ̤ dī dṳ̌ing-dǎ̤ cèng kuŏi duōi iâng.
- Biē-gŏ-nêng iǎ ŏ̤ ka̿u gṳ̀ miâng iǔ siǒng-tê.
- ¶ Ŭ-cì-sî iǔ nêng iáu-diū cì-ciă nă gṳ̌ mî-diū gâ̤ nêng hā Iǎ-Sú-di̿ lâ̤, sī hăi-ciě, ǐ bāng-ǎ: Iǎ-Sú ta̿i gṳ̀ í hǎu, ŭ ǎ-ciě ciū ŏ̤ uā dī, mì-ciú iǎ chū-dă̤-gi̿ng.
- Ŭ cèng cāi nêng dú ngò̤-ngò̤-di̿, cèng gǐ-guo̿i, uā, Iŏ̤ng nêng sī Duōi-pĭ gâ̤ gṳ̌ing-só̤ng, ēng sī?
- Huă-lī-so̿ nêng tia̿ng-nī-gi̿ng, ciū uā, Iŏ̤ng nêng dāi tiāu gṳ̌ dú sī ka̿u-diū gṳ̌-uâng Piĕ-sái-pŭ.
- Iǎ-Sú dă̤-dí gṳ̀ gâ̤ séng-i̿, ciū iáu gṳ̀ uā, Mǎu-lō̤ng sū-mū gŏ lâ̤ iáu cù-cī sióng-cáing, dú ŏ̤ bi̿ng ca̿ huáng-biâng; mǎu-lō̤ng sū-mū sêng, sū-mū nêng chio̤̿, lâ̤ iáu cù-cī sióng-cáing cǒng mài bǎu-dă̤-diū:
- Lâ̤-sī Să-dàng, dāi-tiāu Să-dàng, ciū-sī iáu cù-cī sióng-cáing; gṳ̀ gâ̤ gŏ nī-di̿ ŏ̤ bǎu-dă̤-diū?
- Uòi lâ̤-sī ka̿u-diū Piĕ-sái-pŭ dāi-tiāu gṳ̌, nì gâ̤ hă-sáing dāi-tiāu gṳ̌ ǐ sī ka̿u-diū sū nêng nī? iŏ̤ng-gă̤-sĭ gṳ̀ ŏ̤ uā nì iǔ cho̤̿.
- Uòi lâ̤-sī ka̿u-diū Ciōng-Di̿ gâ̤ Sěng dāi-tiāu gṳ̌, Ciōng-Di̿ gâ̤ gŏ ciū da̿u nì iŏ̤ng-di̿ làu.
- Nêng gōng-ciōng ŏ̤ nì hǎu-giŏ̤ gâ̤ nêng chio̤̿-di̿, chiǒng gṳ̀ gâ̤ mî-dī nī? Cǒng niōng sáing gǎi-diū iŏ̤ng bǎu-giŏ̤ gâ̤ nêng, cuo̿i-hē ciū ŏ̤ chiǒng gṳ̀ chio̤̿-di̿ gâ̤ mî-dī.
