This page has not been proofread.
Mǎ-tuo̿i, 12.
31
Dï 12 Cióng.
- 1 Ǔ-cì-sî Iǎ-Sú da̿u úing-sǐ-nì giǎng mà-ciě châing-li̿-gua̿, hǎ-sáing bǔ-gṳě, ciū nṳ̌ mà-ciě lâ̤ iè.
- 2 Huǎ-lī-so̿ nêng chū-gi̿ng, ciū iáu Iǎ-Sú uā, Nì gâ̤ hǎ-sáing ca̿ úing-sǐ-nì ēng gǒ̤ng ca̿ gâ̤ dī.
- 3 Iǎ-Sú uā, Cě̤ng-chîng Duōi-pǐ iáu gáing gṳ̀ gâ̤ nêng bǔ-gṳě gâ̤ sî-hē ca̿ gâ̤ dī, nì gu̿ ēng-nǎing nāng-gua̿ à?
- 4 Duōi-pǐ nì Ciōng-Di̿ gâ̤ chiō̤, iè bâi-diū gâ̤ biǎng, iǒ̤ng biǎng Duōi-pǐ iáu gáing gṳ̀ gâ̤ nêng dú ēng gǒ̤ng iè, cǒng-lâ̤ ci̿-sí ciū gǒ̤ng iè.
- 5 Lṳ̌-huǎ sṳ́-di̿ gi̿-diū ci̿-sí da̿u dāing-di̿ ngà̤ úing-sǐ-nì, sī mǎu cò gâ̤, nì iǎ ēng-nǎing nāng-gua̿ à?
- 6 Uòi iáu nì uā, Iǒ̤ng-di̿ iǔ cì-ciă nêng piāng dāing ga̿ing duo̿i.
- 7 Se̿ng-géng-di̿ uā, Uòi o̿ ta̿i nêng kǒ̤-lǐng gâ̤ dī, ēng o̿ hṳ̿ing-ci̿ gâ̤ dī, nì lâ̤ měng-bà̤ iǒ̤ng cì gṳ̿ dī sū-mū i̿-su̿, ciū mài nà mǎu cò gâ̤ nêng uā sī iǔ cò.
- 8 Éng-ṳē nêng gâ̤ Gṳ̌ing iǎ sī úing-sǐ-nì gâ̤ Cṳ̌.
- 9 Iǎ-Sú giǎng ǔ-di̿ ko̤̿, nì lǐ-ba̿i-dǒ̤ng.
- 10 Da̿u ǔ-di̿ iǔ cì-ciǎ nêng cì ga̿i-tī siǔ kú-tiāu. Iǔ nêng lâ̤ mōng Iǎ-Sú, uā, Úing-sǐ-nì í-bāng, gǒ̤ng, ēng gǒ̤ng? Gṳ̀ gâ̤ séng-i̿ sī o̿ lāu ciǎ dī ga̿u Iǎ-Sú.
- 11 Iǎ-Sú uā, Nì dǐ-bíng mǎu-lō̤ng sū-mū nêng iǔ cì-tê iông úing-sǐ-nì dǔing hā káng-di̿, nī-di̿ kǎing běng-cie̿ gṳ̀, ēng tuói gṳ́ iòng lâ̤?
- 12 Nêng cǒng piāng iông ga̿ing dì-cîng dǎ̤ cāi! Gu̿-chu̿ úing-sǐ-nì sī gǒ̤ng ca̿ gâ̤.
- 13 Ciū iáu kú-tiāu siǔ gâ̤ nêng uā, Nì siǔ sṳ́ing chṳ̌ lâ̤. Ǔ ciǎ nêng nà siǔ sṳ́ing chṳ̌ lâ̤; siǔ ciū hǎu-tiāu, iáu ǔ ga̿i-tǐ siǔ ǐ-búing.
- 14 Huǎ-lī-so̿ nêng chṳ̌ ko̤̿, sióng-liông niōng gōng-ciōng-iōng ŏ̤ miè-tiāu Iǎ-Sú.
- 15 Iǎ-Sú dǎ̤-dí kǐ lâ̤, ciū pī-tiāu ǔ sù-cài, iǔ cèng cāi nêng gáing gṳ̀ ko̤̿; iǔ bāng gâ̤ nêng, Iǎ-Sú dú ta̿i gṳ̀ í hǎu.
