Филя арсесь: «куш вете промкст пурнак, яла теке мезеяк а лиси, малавгак аволь вейкеть ломантне — вейке корты истя, омбоце лиякс. Зярс иля робота, яла теке кулат, кияк а ледстянзаткак, кияк паро вал а ёвты...»
«Кулан теск совхозонтень, яла теке велев таго роботникекс а молян» — ютась пряванзо ёндолкс...
Сюлмизе пиксэнть киргазонзо, арсе куземс чувтонть пряс ды килькштямс пикс пенть моргонтень, новолемс чувтонть прясто. Варштась паксянтень, паксясонть тветить чинжарамот, пейдезь ваныть чинть каршо... Стакасто укстась:
«Тьфу!.. Овсе новольсть кедень-пильгень». Укстизе пиксэнть киргастонзо.
«Эх, руця понкс! — ранкстась эстензэ ды вачкодизе пиксэнть мастор ваксс. — Ну, мезе мон арсень тееме? Мон бу ёмавлинь, яла теке масторось а ёми, яла теке ломантне кармить эрямо. Мон улян профсоюзонь кеме членкс, карман бороцямо, роботасост обезличканть маштомо.»
Озась чувтонть ваксс...
— До-он!.. До-он!.. До-о-он!.. — каятотсь баягань вайгель паксянть келес. Чавсть кото част.
Филя лиссь вирьстэнть, стакасто эскельдязь мольць олго омётонть бокас. Робочайтне умок уш пурнавсть, прядызь роботаст, сын поксарить олгтнэнь потсо, прок тулявкст.
Мезе ютась Филянь прява, кияк а соды, яла теке аволь истямо смел, кодамо ульнесь.
— Ки моли промксов? Союзонь члентнэнень обезательна молемс, — пеень сускозь пшкадсь Филя.
23
