— Таго? Прок чова ловажасо келенть човить, лезэ косояк арась. Улевельгак эрьва конань эсинзэ, умок пурнавлизе-сэрнявлизе, меньгак промскак аволь эряв тензэ.
— Кадык тетьксить кель варяст. Миненек ведь чись ютась — 2 целковойть 50 трёшник пандт...
— Сынь промкс, заведующеесь сынст — сявдикска.
Весе раказевсть.
— Проповедничамс тесэ а мезть, раксемскак а ки лангсо. Вана саемс куш тонть, Ларионов, — кежейсто Филя невсь Останков ёнов.
Останков прась пекензэ лангс, трокс варштась весеме ёнов.
— Народонть кургост а потомдасыть, — пшкадсь Останков ды кармась чова олгинесэ пей сывелензэ карамо.
— Тон кеж иля сай, — кармась кортамо Федянь Эхрем. — Тон, прок боров ярсамодо мейле валяят. Жаловнят, мерят, 2 целковойть 50 трёшник? Роботамо лиснить тече? Эзить лисне, проклит саензат! — Эхрем нерьксни Останковонь.
Останков почаксась чаво олго колосонть.
— Валске спискас понгсь, мезе эщо эряви? — раказь пшкадсь Абрахимин Коля.
— Осипов, адядо сыргатанок, — рангстась Татаринцев.
Осипов тей-тов кайси прянзо — молемс а молемс?
— Молят эли тармаскадыть тезэнь? — стамбарнэ кучкордызе Коля Осиповонь.
24
