Page:Од пингень вий (Т. А. Раптанов, 1934).djvu/24

From Wikisource
Jump to navigation Jump to search
This page has been proofread.


Филянь мелезэ ульнесь велявтомс мекев, ёвтамс потсо валонзо, кода сон вечксы Катянь. Друк, прок изамо пейсэ нерькставсь седеезэ, мик кирнявтовсь а ламошкадо верей; ледьс мелезэнзэ совхозсь, панжсь сельмензэ икелев се омутось, козонь может ваямо совхозось. «Аволь шка ней тейтерде думамс», — мерсь эстензэ ды сыргась роботыцятнень ёнов.

Менелесь, прок сэнь паця ацавсь. Виресь лажнось вармадонть, вармась шкань-шкань кежейстэ вачкодеви чувтнэнень. Вирьсэнть чувтнэ мендевить ве пелев ды састыне-састыне видемить одов. Се шкастонть пиже лопатне каштордсть, прок горниповт, мазыйстэ чоледсть озятне... Филя яла теке эзь кулсоно эйсэст.

Сон ашти прок иневедьсэ, вармась кежейстэ перьканзо тапардавсь. Ансяк сон мартонзо, ансяк сон вешки вакссонзо озязтнэ марто, весёлгавты эйсэнзэ. Варшты перьканзо, киньгак а неи, потомдасынзе пилензэ, яла теке вармась маряви.

«Вадрянть учомс а косто. — Филя пезнавтынзе суронзо черезэнзэ, сельмензэ тетькинзе плошкакс. — Поводемс кирганть те моргонтень... Мезень кис мастор лангсо эно эрятанок? Чиде-чис тейдяно вадря эрямо, сон кодаяк миненек а тееви. Зяро иеть эринь ломань кедьсэ, кирдинь вачо пеке, кандынь штапо ланго. Ней минь азортнэ, таго вачотанок-штапотанок. Нузялтнаок эсь прянок андомс, оршамс. Зярошка пакся, сон кадови, наксады. Тельня мезде лопнямо карматанок? Эх... Лучи уш а мешамс мастор лангсо»...

22