( 7 )
Atin ping catau tauling dinatang
qng marayung barrio carin menibatan
anĝus-anĝus ya pin uli na ning pagal
ala yang queliuan quetang tatagalan.
Bista't macarayu tucnanĝan nang barrio
queang abalitan agad nang mequiglo
iña marapal ya nasa nang abatio
itang mepaliari quetang mapiang tau.
Tula ing minunang queang penamdaman
uli ning desgracia miras at dinatang
canitang mabandi taung mayacayan
dinatang nang horas qng capamayaran.
Iting taung iti è aliua't iya
ing pemaluca na canitang minuna
sugat nang memiuc canitang púsu na
mirin yang capaldan metula ing lub na.
Dapot é macanian mibayu ya isip
quetina aucul ing pamagmasaquit
é sucat paburen qñg api mapulid
ing calulung pungul á ala pang malit.
Pablasang qng iti ala ya pang sala
qug dauac ning ibpa é ya sucat maua
iña ing daptan cu ing samsaman cu ya
iligtas qñg api qñg ban é mate ya.
